Спасовски: Македонија е најбезбедна земја на Западен Балкан

Република Македонија е најбезбедна земја на Западен Балкан и е во друштво со 36 земји најбезбедни во светот. Тоа се податоци и анализи што ги прават релевантни меѓународни организации од делот на безбедноста, вели министерот за внатрешни работи Оливер Спасовски.

Одговарајќи на прашањето за истрагите во врска со пресметките помеѓу криминалните банди во Старата скопска чаршија, во Косово и во Грција, министерот Спасовски ја потврди решеноста на ова раководство на МВР да се справи со криминиалните структури коишто се создавани и градени во изминатите 30 години, без разлика кои се и од каде доаѓаат.

-Ова е првпат да се води сериозна битка против криминални структури. И во таа наша намера, никој со ништо и за никаква цел не може да нѐ запре заради тоа што сметаме дека безбедноста на граѓаните е наш врвен приоритет. Инаку, што се однесува до конкретни настани јас можам да зборувам за настани кои што се случиле на територијата на државата и немаме и не можеме да разговараме за убиства во Грција и во Косово. Тоа е работа на истражните органи на тие земји и тие треба да ги дадат одговорите за овие инциденти кои се случиле, потенцира министерот Спасовски.

За случајот што се води во Скопје, Спасовски образложи дека има напредок во истрагата и се работи интензивно.

-Сметам дека можеме да дојдеме многу брзо до целосно расчистување на овој случај. Меѓутоа поважно е дека најголемиот дел од криминалните структури во т.н. групи кои што делувале и биле градени, а во изминатите 30 години најмногу поддржани во времето на режимот, веќе се изнесени пред лицето на правдата и издржуваат казни за тоа што го што го прават. Да напоменам дека само последниот месец имаме апсење на тројца членови на криминална група, коишто претходно беа во бегство или беа недостапни за органите на прогонот. Така да, мојата јасна порака е дека ќе направиме сѐ за да се штити интересот на граѓаните, безбедноста, јавниот ред и мир, ќе направиме сѐ без поговор секој еден што се занимава со криминал да одговара, сите тие криминални групи да бидат растурени, да се конфискува сето она што го имаат постигнато на нелегален начин и уште еднаш упатам јасна порака никој да не мисли дека може да биде посилен од државата. Тоа не било и нема да се случи, дециден е Спасовски.

Прашан за измените во Кривичниот законик и дали има политички пазар, Спасовски нагласува дека не може да стане збор за политички пазар, заради тоа што, како што вели, кој е резултатот од таквиот пазар доколку постоел. Сметам, истакнува Спасовски, дека нема основа за политички пазар, а најмалку може да има основа за политички пазар кога се во прашање витални национални интереси.

За тоа дали СДСМ се гледа во „Европскиот фронт“ за што говореше лидерот на ДУИ Али Ахмети, а во кој има простор за сите проевропски и проамерикански политички партии, Спасовски со порака дека СДСМ е една од најпрогресивните партии, СДСМ е партијата која сите важни чекори за државноста и напредокот на државата биле донесени кога таа била на власт.

-И спрема тоа, нè да се гледа – СДСМ е стожер на европскиот фронт. Таа е водечка политичка сила во државата кога станува збор за проевропскиот блок и СДСМ е таа околу која ќе се собере европскиот фронт, потенцира Спасовски, додавајќи дека еднаш и засекогаш мора да се одвојат прогресивните сили во државата, визави, сите оние кои што ја влечат државата назад, оние ретроградни сили, оние сили коишто не ѝ помагаат на држата да напредува.

За актуелната политичка состојба во државата, министерот Спасовски оценува дека никој не може да им опонира на 80 проценти од граѓаните што сакаат европска перспективата.

-Осумдесет проценти од граѓаните во Република Македонија посакуваат да бидат дел од европското семејство. Кој е тој што може да опонира на 80 проценти од граѓаните? Кој е тој што сака да ја уништува перспективата на државата? Затоа сметам дека сите политички субјекти, и сите одговорни политичари треба да работат на остварување на една ваква цел и нема изговори веќе во државата за нашиот напредок дека некој друг ни стои на патот во остварување на нашите цели, нагласува Спасовски во интервјуто за Фронтлајн и ЦИВИЛ Медиа.