Превозниците на работ на издржливост: Ограничени ресурси и итни барања

Приватните превозници во Скопје предупредуваат дека од понеделник ќе започнат со работа со последните преостанати ресурси. Според нив, само 30% од 200 автобуси се функционални, што е резултат на изнемоштената состојба во која се наоѓаат.

„Нашето трпение е при крај. Мора да разберете низ што поминуваме. Ситуацијата е сложена, а условите се многу тешки. Затоа ги повикуваме советниците да покажат разбирање и да ни помогнат во пронаоѓањето заедничко решение за нашите проблеми. Имаме капацитет од 200 автобуси и можеме да го покриеме делот што го покрива ЈСП. Ако се најде решение, целата оваа криза би можела многу брзо да заврши,“ изјави Јовица Зафировски, претставник на приватните превозници.

Шоферите бараат поголеми примања за да останат во државата

Според превозниците, многу шофери ја напуштаат државата поради ниските примања.

„Денешната реалност е дека 20.000 денари плата не е доволно за да ги задржиме шоферите. Потребни се поголеми плати, бенифициран стаж и исплата на ноќен труд и К-15. Кажете ми, кој денеска работи за 20.000 денари? Поради тоа, повеќето возачи од ЈСП, како и нашите, ја напуштија државата. Како да ги убедиме да се вратат? Како да ги задржиме? Потребно е да се зголемат платите. Мора да се исплаќаат дополнителни надоместоци за бенифициран стаж, за ноќен труд и за К-15. Ништо од тоа сега не се покрива“ изјави Влатко Тодоровски, додавајќи дека сите овие мерки се неопходни за да се стабилизира состојбата.

Обвинувања за кризата: Кој е виновен за хаосот?

Политичките обвинувања продолжуваат. Од коалицијата ВЛЕН, вината за колапсот во јавниот превоз ја лоцираат кај градоначалничката Данела Арсовска и Демократската унија за интеграција (ДУИ).

Од СДСМ, пак, ја посочуваат владејачката ВМРО-ДПМНЕ како одговорна. „Колабиран јавен превоз е резултат на ветувањата на Мицкоски и неговата неспособност да го реши проблемот,“ изјави портпаролката Богданка Кузеска.

Интервенции од Владата: Нафта за ЈСП, но до кога?

Премиерот Христијан Мицкоски информира дека 250.000 литри нафта од државните резерви веќе се испорачани до ЈСП, но предупреди дека оваа количина ќе биде доволна за само десетина дена.

„Менаџментот на ЈСП мора итно да ги набави потребните количини за нормализирање на превозот,“ апелираше Мицкоски.

Протести на граѓаните: Барања за трајни решенија

Средношколци, студенти, жители на Шуто Оризари и други револтирани граѓани вчера протестираа пред Град Скопје. Тие побараа итни, но трајни решенија за јавниот превоз.

„Секојдневно доцниме на работа и училиште. Време е за трајни решенија, а не импровизации,“ порачаа граѓаните.