Она што во изминатата година и половина го работевме напорно со главна цел реструктуирање на економијата, денеска ги дава своите резултати. Согласно податоците на Државниот завод за статистика, реалниот раст на Бруто-домашниот производ (БДП) во третиот квартал од 2025 година изнесува 3,8%. Ова претставува дополнително забрзување на економската активност, по растот од 2,9% во првиот и 3,5% во вториот квартал годинава. Притоа, растот од 3,8% е еден од највисоките во последните неколку години. Во споредба со земјите од регионот и од ЕУ, согласно податоците за третиот квартал за 2025 година, Македонија е на трето место по раст на БДП, при што повисок раст е забележан во Ирска и Данска, соопшти на денешната прес-конференција министерката за финансии Гордана Димитриеска Кочоска.

Таа информира доколку споредуваме со земјите од регионот, за третиот квартал од 2025 година, растот во Србија изнесува 2% , во Црна Гора 3,1% , во Хрватска 2,3% , во Бугарија 3,1% , во Романија 1,2% итн. Кумулативно, растот во првите три квартали годинава изнесува 3,4%.

– Главниот двигател на растот во третото тримесечје беа бруто инвестициите, кои се зголемија за исклучително високи 30,6%, пред се како резултат на силниот раст на инвестициите во основни средства. Со ова, од аспект на инвестиции, ова тримесечје е едно од најуспешните од кога се мери економската активност на земјата. Податоците за растот на инвестициите се најдобар показател за високата доверба на инвеститорите во домашната економија. Дополнително, податоците потврдуваат дека силната посветеност на Владата во изминатиот период за инвестиции во нови производни капацитети и зголемување на конкурентноста на компаниите даде исклучително позитивни резултати, рече министерката за финансии во Медиа центарот во Владата.

Според неа, високиот раст на инвестициите во овој период доаѓа како комбинација на неколку позитивни трендови во економијата. Притоа, се истакнува придонесот на инвестициската активност на домашните претпријатија, имајќи ја во вид високата искористеност и заинтересираност за поволната кредитна линија обезбедена од Владата.

-Важен придонес кон растот на инвестициите имаше и силната посветеност на Владата на капиталните инвестиции и оптимизацијата на нивните трошоци, динамика, и услови за градба. Оптимизацијата на капиталните инвестиции значеше и интензивирана реализација на големите инфраструктурни проекти финансирани од државата, како што се Коридор 8 и 10. Дополнително, значаен двигател на бруто-инвестициите беше и поддршката на општините за реализација на капитални инвестиции со цел порамномерен регионален развој и унапредување на животот на граѓаните. Сумарно, ваквиот позитивен тренд кај инвестициите укажува на исправноста на Владините политики, дури и во исклучително предизвикувачки период за глобалната економија, рече Димитриеска Кочоска.

Освен инвестициите кои се главниот двигател на растот во третиот квартал, позитивен придонес кон растот имаше и финалната потрошувачка со раст од 1,8%.

– Доколку се анализира БДП од производна страна, раст е забележан во сите сектори, при што особено се истакнува силниот раст во Градежништвото од 21%. Притоа, особено изразен е растот кај нискоградбата, која во третото тримесечје годинава се зголеми за исклучително високи 58,5%, реален раст каков што во македонската економија не е забележан во последната деценија. Ваквиот раст кај градежништвото и нискоградбата е во линија со податоците за бруто-инвестициите, и претставува дополнителен показател за откочувањето и интензивирањето на капиталните инвестиции во големи инфраструктурни проекти. Освен градежништвото, раст во овој квартал бележат и останатите сектори. Притоа, услугите бележат раст од 2,9%, при висок раст кај Информациите и комуникациите од 7,4%, Стручните, научните, и техничките дејности од 6,1%, како и Трговијата и транспортот од 2,6%. Истовремено, Индустријата се зголеми за 1,3%, при раст на Преработувачката индустрија од 2,5%. Забележителен е и растот на Земјоделството од 4%, рече Димитриеска Кочоска.

Овие податоци, како што нагласи, се уште поголем поттик за целата Влада да продолжиме да работиме со уште позасилено темпо за да овозможиме повисоки стапки на економски раст што носи до повисок животен стандард за граѓаните.