На денешниот состанок на министрите за надворешни работи на ЕУ во Копенхаген стана јасно дека Брисел и повеќето земји-членки се подготвуваат за долга војна, а не за мир, напиша на Х по средбата шефот на унгарската дипломатија Петер Сијарто.
„Тие сакаат да испратат десетици милијарди евра во Украина за плати на војниците, беспилотни летала, оружје и функционирање на украинската држава,“ наведе Сијарто.
Пренесувајќи дел од атмосферата на средбата на шефовите на дипломатиите на 27-те земји-членки, тој додаде дека „имаше огромен притисок за забрзано пристапување на Украина во ЕУ, нови санкции врз руската енергија и дополнителни шест милијарди евра од Европскиот мировен фонд за вооружување на Украина“.
Според неговата оценка, Европската комисија повторно дејствувала како „украинска комисија“, служејќи им на интересите на Киев пред интересите на земјите-членки.
„Тие целосно ги игнорираат Унгарците во Закарпатието и нашата енергетска безбедност, сè уште одбивајќи да одговорат на заедничкото писмо што го испративме со Словачка за Украина што го загрозува нашиот пат на снабдување,“ додаде Сијарто.
На крајот од својот пост на Х, унгарскиот министер го повтори, како што наведе, јасниот унгарски став:
Поддршка за мировните напори на американскиот претседател Доналд Трамп, затоа што само договор меѓу САД и Русија може да ја заврши војната.
Отфрлање на присилното пристапување на Украина во ЕУ, што би ги уништило унгарските земјоделци и безбедноста на храната.
Одбивање да се дозволи парите на унгарските даночни обврзници да ја финансираат украинската армија.
Отфрлање на санкциите што го загрозуваат снабдувањето со енергија на Унгарија и ги зголемуваат трошоците за домаќинствата.
Пред министерската средба во Копенхаген, Сијарто исто така предупреди на социјалната мрежа дека очекува „да се соочиме со провоено цунами. Повеќе пари и оружје за Украина, присилно пристапување кон ЕУ, започнување воена операција… огромен притисок да се откажеме од нашиот промировен став,“ нагласувајќи дека нема да поддржи никаква одлука што е против унгарските интереси или што значи одложување на мировните иницијативи.