Шумарската служба во планината Пирин, над Банско, пронашла 62-годишен маж кој бил исчезнат повеќе од една деценија. Станува збор за Бојан Иванов од Русе, кој бил формално прогласен за починат во 2020 година.
Иванов последно живеел во селото Ново Село, во околината на Русе, и не бил во брак. Неговата мајка, Тодора Александрова, на 9 јуни 2015 година пријавила дека синот ѝ исчезнал, откако со месеци немала никакви информации за него. Поради долгиот период без трага, во 2020 година судот донел одлука со која Иванов бил прогласен за починат, а датумот на смрт бил запишан како 31 декември 2013 година.
Во судската постапка бил сослушан сведок кој го познавал Иванов и го вработил како општ работник во 2013 година. Тој изјавил дека од есента на таа година повеќе не го видел, а дополнително посочил дека Иванов имал издавачка куќа и дека бил под финансиски притисок поради долгови кон лихвари и извршители.
По пронаоѓањето во Пирин, Иванов бил однесен во полициската станица во Банско за утврдување на идентитетот. По проверката, бил пуштен бидејќи не се барал за никакво кривично дело. Полицијата му понудила сместување во социјален дом, но тој одбил, објаснувајќи дека има средства и не му е потребна помош. Засега не е познато каде се упатил по напуштањето на станицата.
Властите сега треба да потврдат дали пронајдениот маж е истото лице кое било формално прогласено за починато и да утврдат како ќе се постапува понатаму со оглед на постојната судска одлука.