Министерството за внатрешни работи (МВР) ги известува граѓаните дека Секторот за компјутерски криминал активно работи на истраги и мерки за справување со фишинг напади. Овие напади имаат за цел да ги измамат граѓаните и да ги добијат нивните лични или финансиски податоци. Фишинг напади се извршуваат преку лажни пораки на телефон, маил, веб-страници или пораки на социјалните мрежи, кои изгледаат како да доаѓаат од доверливи извори, како банки, државни институции или познати компании.
Фишинг напади преку лажни пораки
МВР соопшти дека фишинг нападите најчесто се маскирани како комуникација од легитимни извори. Лажните пораки, веб-страници или објави на социјалните мрежи се дизајнирани да ги имитираат официјалните институции или компании за да ги обманат корисниците.
Лажни фактури на правни лица
Министерството информира дека е забележана појава на достава на лажни фактури за уплата на парични средства. Овие фактури се испраќаат на електронските адреси на вработени во правни лица овластени за плаќања, во име на управителите на правните лица, но од лажни електронски адреси. Фишинг напади од ваков тип се насочени кон финансиска измама на компаниите.
Масовна истрага: 43 лица осомничени за измами со брзи кредити
- МВР предупредува: Граѓаните да не наседнуваат на измами со лажни сообраќајки
Препораки од МВР
МВР апелира до граѓаните да бидат внимателни при користење на електронската пошта и интернет. Лажните пораки не треба да се отвораат, особено линковите или прилозите во нив. Граѓаните се повикани да ја проверуваат адресата на испраќачот, бидејќи официјалните институции и компании користат службени домени. Министерството препорачува да не се внесуваат лични податоци, како кориснички имиња, лозинки или броеви на платежни картички, на сомнителни веб-страници. Исто така, се советува користење на двофакторска автентикација (2FA) за дополнителна заштита на сметките. Граѓаните се охрабрени да пријават сомнителни пораки кај надлежните институции или во нивната банка.
Извор: Kanal5