Нигерија ја прифаќа помошта, но бара почитување на нејзиниот суверенитет
Нигерија ја поздрави можната американска помош во борбата против исламистичките бунтовници, но со јасен услов – нејзиниот територијален интегритет мора да биде целосно почитуван. Оваа реакција следува по изјавата на американскиот претседател Доналд Трамп, кој ѝ се закани на западноафриканската земја со воена акција поради, како што рече, „неспособноста да се спречи прогонството на христијаните“.
Трамп со остро предупредување и наредба до војската
Трамп ги обвини нигериските власти за злосторства против христијаните и најави дека САД можат да интервенираат со воена сила. На својата платформа Truth Social напиша:
„Доколку нигериската Влада продолжи да дозволува убивање на христијани, САД веднаш ќе ја суспендираат целата помош за Нигерија и многу е веројатно да влезат во оваа сега посрамена земја, ‘пукајќи со оружје’, за целосно да ги уништат исламските терористи кои ги извршуваат овие ужасни злосторства.“
Тој нагласи дека му наредил на американското „Министерство за војна“ да се подготви за можна акција:
„Ако нападнеме, тоа ќе биде брзо, свирепо и слатко, исто како што терористичките насилници ги напаѓаат нашите сакани христијани.“
Пентагон се подготвува, Нигерија со дипломатски одговор
По изјавите на Трамп, американскиот министер за одбрана Пит Хегсет потврди дека Пентагон започнал подготовки за акција против Нигерија.
„Да, господине. Убивањето на невини христијани во Нигерија и насекаде мора веднаш да престане. Министерството за војна се подготвува за акција. Или нигериската влада ќе ги заштити христијаните, или ние ќе ги убиеме исламските терористи кои ги извршуваат овие ужасни злосторства,“ напиша Хегсет на платформата X.
Во исто време, нигерискиот претседател Бола Ахмед Тинубу реагираше на предупредувањето, истакнувајќи дека карактеризирањето на земјата како религиозно нетолерантна „не ја одразува националната реалност“.
„Верската слобода и толеранцијата се фундаментален принцип на нашиот колективен идентитет и секогаш ќе останат такви. Нигерија се спротивставува на верското прогонство и не го охрабрува. Нигерија е земја со уставни гаранции за заштита на граѓаните од сите религии,“ порача Тинубу.
Контекст и меѓународни реакции
Тензиите се зголемија откако Трамп ја најави намерата да ја стави Нигерија на списокот на „земји од особена загриженост“ поради наводните напади врз христијани.
Тој изјави дека „христијанството се соочува со егзистенцијална закана во Нигерија“, а радикалните исламисти се одговорни за „масовен колеж“.
Претходно, американскиот сенатор Тед Круз побара Конгресот да ја означи Нигерија како прекршител на верските слободи, наведувајќи извештаи за „масовни убиства на христијани“.
Нигерија, со население од околу 220 милиони жители, е речиси еднакво поделена меѓу муслимани и христијани, и со години се соочува со екстремистички напади од групата Боко Харам, која настојува да воспостави радикална исламска држава.