Еразмус+ програмата, насочена кон унапредување на образованието, продолжува да спроведува проекти кои го зајакнуваат професионалниот развој на наставниците. Еден од најважните проекти, насловен „одржување на благосостојбата на младите наставници“, во текот на изминатите 24 месеци овозможи обука на поискусни наставници за да станат ментори на своите помлади колеги. Главната цел е младите наставници успешно да се адаптираат во училниците и да останат мотивирани за продолжување на својата кариера.
На завршната конференција на проектот, организирана од СОНК, учествуваа партнерски организации од Белгија, Бугарија и Словенија, што го нагласи значењето на меѓународната соработка.
Наставниците како столб на образованието
„Поддршката за младите наставници е особено значајна, бидејќи професијата наставник денес, за жал, не ужива соодветна почит и престиж. Оваа состојба не е специфична само за нашата земја, туку е глобален предизвик. Како нова Влада, наместо да се потпираме на илузии за подобрување, веднаш започнавме со конкретни активности за создавање подобри услови за работа и зголемување на платите, со цел да ја подигнеме мотивацијата на наставниот кадар,“ изјави Елена Ивановска, државен секретар во Министерството за образование и наука.
Долгорочни инвестиции и зголемени плати
„И покрај финансиските ограничувања, оваа година успеавме да го започнеме процесот на зголемување на платите на наставниците. Планот е да обезбедиме раст од најмалку 46%, а во најдобар случај до 60% во следните четири години, зависно од инфлацијата,“ истакна Ивановска.
Таа додаде дека владата одобри дополнителни 10 милијарди денари за буџетот на Министерството за следната година, со што вкупниот буџет ќе изнесува 40 милијарди денари. Овие средства ќе се наменат за подобрување на училишната инфраструктура, модернизација на информатичко-комуникациската технологија, како и опремување на лабораториите и кабинетите.
„Владата одлучи значително да го зголеми буџетот на Министерството за образование за следната година, што ќе ни овозможи да продолжиме со инвестициите во училиштата. Ќе добиеме дополнителни 10 милијарди денари, што ќе го подигне вкупниот буџет на 40 милијарди денари. Со овие средства ќе ги подобриме сите аспекти кои влијаат врз квалитетот на образованието,“ додаде Ивановска.
Партнерство за стабилно образование
„Нашата цел е младите наставници да останат мотивирани и да ја продолжат својата работа со истиот ентузијазам што го имале при изборот на професијата. Наставниците мора да се чувствуваат почитувани и вреднувани,“ додаде Ивановска.
СОНК останува клучен партнер на Министерството за образование, обезбедувајќи долгорочна економска стабилност и зголемување на мотивацијата кај образовниот кадар.