Албанската влада останува на ставот дека платформата „ТикТок“ ќе биде целосно забранета во земјата на една година, откако БајтДенс, компанијата сопственик на „ТикТок“, објави дека ќе бара „итно појаснување“ во врска со оваа одлука. Премиерот Еди Рама реагираше со остра изјава, потенцирајќи дека „во Албанија одлучуваат Албанците, а не сопствениците на алгоритмот на ‘ТикТок’.“

Целосна блокада на ТикТок во Албанија: Владата презема радикални мерки по убиството на ученик

Реакцијата на Албанија кон барањето на БајтДенс

Во новото соопштение, компанијата БајтДенс побара од албанските власти да објаснат зошто се одлучиле на ваква рестриктивна мерка, посочувајќи дека имаат потреба да разберат како одлуката е донесена и кои се нејзините законски основи. Меѓутоа, премиерот Рама изјави дека Албанија нема обврска да дава дополнителни образложенија на компанија која, како што вели, „ја контролира содржината преку својот алгоритам, а притоа не презема доволно мерки за заштита на децата и младите.“

  • „Во Албанија одлуките ги носат Албанците, а не сопствениците на алгоритамот ‘ТикТок’. Иако сме мала земја и не можеме да бараме од ‘ТикТок’ да ги заштити децата и младите од опасностите на неговиот алгоритам, се надеваме дека платформата ќе го направи тоа за доброто на човештвото, вклучително и за Албанија,“ изјави Рама.

Широки консултации со родителските заедници

Премиерот посочи дека одлуката не е „реакција на обичен настан“, туку е „широко консултирана мерка“ со родителските заедници во училиштата низ цела Албанија. Според владата, има голем број загрижувачки извештаи за негативни ефекти врз тинејџерите, вклучувајќи малтретирање, поттикнување насилство и несоодветни содржини.

  • „Оваа одлука не е избрзана, туку неопходен чекор за заштита на децата, бидејќи Албанија е демократска земја. Нашата порака е јасна: или ‘ТикТок’ ќе преземе мерки за заштита на децата во Албанија, или Албанија самата ќе ги заштити своите деца од ‘ТикТок’,“ изјави Рама.

Детали за забраната

Одлуката за затворање на „ТикТок“ ќе стапи на сила на почетокот на следната година, а точниот датум сѐ уште не е утврден. Претходно, албанските власти објавија дека добиле бројни поплаки од родители и наставници за случаи поврзани со насилно однесување инспирирано од содржини на „ТикТок“. Забраната предвидува целосна блокада на апликацијата низ територијата на државата, со исклучок на посебни истражувачки или безбедносни цели, доколку се процени како неопходно.

БајтДенс бара појаснување

Компанијата БајтДенс, во чие сопствеништво е „ТикТок“, претходно најави дека ќе бара итно појаснување од албанската влада, посочувајќи дека оваа мерка е „екстремна“ и „драстична“. Компанијата сугерира дека нема потврдени докази оти „ТикТок“ е директен причинител на насилството меѓу младите, како и дека проблематичните содржини често се пресликуваат од други социјални мрежи.

Опозициската критика

Од друга страна, не сите во Албанија го поддржуваат овој чекор. Некои опозициски функционери ја оценуваат мерката како „драконска“ и „закана за слободата на говор“. Во изјава за медиумите, пратеничката Ина Жупа од Демократската партија рече дека „одлуката е диктаторска и небалансирана“, и дека може да предизвика проблеми со слободата на изразување, особено кај младите кои користат социјални мрежи.