Ќе започнам со зборовите на Џорџ Сантајана: „Оние кои не можат да се сетат на минатото се осудени да го повторуваат“. Или едноставно речено: „Оние кои не учат историја се осудени да ја повторуваат“. Се борев против овие “woke”, екстремни прогресивни идеи на крајната левица што го доведоа општеството до точка на кршење. Бев и сум горд што ги поддржав Републиканците и Трамп да се борат против овие идиотски идеи. Но, за разлика од Трамп кој е популист (знам дека многумина го сакаат ова денес), јас сум бил, сум и ќе останам горд конзервативец и моите вредности не ми дозволуваат да молчам за ова. Прикачив неколку снимки од вчерашната и денешната ситуација на пазарот заедно со потсетник особено за оние од денешницата кои немаат поим за историјата и лекциите што „треба“ да ги научиме.
Пишува: Кристијан МИЦЕВСКИ
САД го пробаа ова еднаш во 1929 година и се надевам дека сите слушнале за “Големата Депресија”. Веќе сме на добар пат за втората (и тогаш луѓето го исмеваа ова додека не се случи и беше предоцна). Оваа глупост „трговскиот дефицит е лош“ не функционира во 21 век затоа што во најголемите трговски дефицити американската економија се покажа како најдобра, имаше постојан раст, рекордно најниска невработеност и многу други показатели кои покажуваат дека трговските дефицити не влијаат негативно. Пазарите на САД изгубија повеќе од 3,1 трилион долари вчера, а ако се земат сите светски маркети сликата е катастрофална. Истото ќе биде и денес дури и полошо судејќи според досегашните податоци. Јас силно и длабоко се спротивставувам на ова и се надевам дека администрацијата на Трамп ќе го смени курсот или иако мразам да го кажам тоа, но 2026 година е близу и американските “Midterms” избори (ако овој Конгрес не дејствува сега) и колку и да се непопуларни, дезорганизирани и во хаос Демократите, тие ќе победат само затоа што Трамп ги доведе сите апосебно тие што го донесоа на власт и го финансираа, да изгубат огромни пари и со тоа го фрли светот во очекувана, но неизбежна рецесија.
Згора на ова, анти-американското расположение се зголемува дури и во земјите кои се многу пријателски настроени кон Трамп, а да не зборам за традиционалните американски сојузници.
Мала лекција по историја за оние што не знаат:
Законот за царини на Смут-Хејли (1930) беше американски закон кој значително ги зголеми царините за увезената стока за да ги заштити американските индустрии. Спонзорирана од сенаторот Рид Смут и конгресменот Вилис Хејли, таа беше една од најпротекционистичките трговски политики во историјата на САД.
Клучни аспекти на Законот:
• Зголемени царини на над 20.000 увезени стоки, со просечна царина од околу 40%.
• Наменет да ги заштити американските земјоделци и производители од странска конкуренција.
• Другите земји возвратија со воведување сопствени царини, намалувајќи го извозот на САД и го започнаа глобалниот економски пад.
Последици:
• ја поттикна и продлабочи Големата Депресија со ограничување на меѓународната трговија.
• Доведе до пад на глобалната трговија за над 60% од 1929 до 1934 година.
• Ги турна земјите кон економски национализам, слабеејќи ја глобалната трговија и соработка.
• Придонесе за усвојувањето на Законот за реципрочни трговски договори (1934), кој ги укина многу од претходните ефекти и политики.
Често се наведува како лекција против протекционизмот, влијаејќи врз подоцнежните трговски политики на САД како ГАТТ и СТО.