Фертилитетот во слободен пад – потребни се конкретни решенија
Владата предводена од ВМРО-ДПМНЕ најавува сет мерки за справување со, како што велат, сериозната демографска криза која ја зафаќа Македонија последната деценија. Според партијата, државата се соочува со фертилитетна рецесија, која резултира со драстично намален број на новородени деца и негативен природен прираст.
„Фертилитетната рецесија во Македонија трае повеќе од десет години и се одразува со пад на наталитетот. Време е да се препознае овој предизвик, со цел да се бараат решенија кои ќе ја вратат надежта на Македонија“, се вели во соопштението на ВМРО-ДПМНЕ.
Според податоците на партијата, во 2016 година биле родени околу 23.000 деца, додека во 2024 година тој број паднал на 16.737, што претставува пад од 30% во само осум години.
Мерки за поддршка на родителите и младите семејства
Во одговор на овие алармантни бројки, ВМРО-ДПМНЕ предлага повеќеслоен пристап кој вклучува:
До шест бесплатни ин витро процедури за оплодување;
Финансиска поддршка за прво и второ дете;
Ослободување од персонален данок на доход за мајките:
1 година за прво дете
2 години за второ дете
За трето и секое следно дете – ослободување до полнолетство на првото дете
„Многу од државите во светот веќе воведуваат мерки, ги мобилизираат своите економии и ги менуваат политиките и наративите за семејството“, нагласуваат од партијата, додавајќи дека Македонија мора да ги следи тие примери.
Од статистика до реална загуба – повик за дебата
Според податоците на ВМРО-ДПМНЕ итно се потребни вакви мерки. Во 2024 година починале 20.187 луѓе, што значи дека починатите се за 3.500 повеќе од новородените. Ако во 1950 година стапката на фертилитет била 5,7, денес е едвај 1,5 – под прагот од 2,1 потребен за одржување на населението.
„Ова не е само статистика, ова е факт. Ова не е проблем само за идните генерации. Ова е проблем кој се случува сега, во моментов“, потенцираат од ВМРО-ДПМНЕ.
Со апел за јавна дебата, партијата ја повика целата јавност да не ја избегнува темата на наталитетот, туку да ја третира како државен приоритет.
„Време е и Македонија да направи чекор напред. Време е за вистинска дебата. Мора да се зборува јавно за ова и да не се бега од проблемот. И не само како политичка тема туку како приоритет“, се вели на крајот од соопштението.