Настани и митинзи низ општините

Партиите и независните кандидати денеска го продолжуваат вториот ден од кампањата за Локалните избори 2025 со официјални настапи пред гласачите. Кампањата започна вчера и ќе трае до 17 октомври на полноќ, по што следува изборен молк од 24 часа пред првиот круг на гласањето на 19 октомври. Вториот круг ќе се одржи на 2 ноември.

ВМРО-ДПМНЕ најави митинзи во Вевчани во 17:00 часот, во Струга во 18:30 и во Ресен во 20:30 часот. Кампањата за Локалните избори 2025 партијата ја започна во Скопје со митинг на кој беше промовиран кандидатот за градоначалник на главниот град Орце Ѓорѓиевски.

СДСМ и коалицијата продолжуваат со караванот на митинзи во Лозово и во Карбинци во 17:30 часот, во Пробиштип во 18:30 и во Штип во 20:00 часот. Вчера нивниот централен настан се одржа во Крушево, каде што беше промовиран кандидатот за градоначалник Томе Христоски.

Коалицијата ВРЕДИ денеска во 19 часот во Спортската сала „Борис Трајковски” ќе ја одржи Промотивната конвенција. На овој настан ќе бидат официјално претставени кандидатите за градоначалници.

Кандидатот на Националната алијанса за интеграција за Град Скопје, Скендер Реџепи-Зејд, ќе ја претстави изборната програма заедно со кандидатите за советници. Кандидатот на Коалицијата НАИ за градоначалник на Општина Чаир, Бујар Османи, вчера ја промовираше својата програма за локалните избори.

Кандидатот за градоначалник на Куманово и претседател на Движењето ЗНАМ – За наша Македонија, Максим Димитриевски, вчера имаше повеќе активности и средби со граѓани.

Правни рамки и бројки за изборите

Во Изборниот законик, член 69а, е наведено дека изборната кампања опфаќа јавни собирања, јавни настани, јавно поставување на плакати, видео презентации на јавни простори, изборно претставување преку медиуми и интернет, дистрибуција на печатени материјали, како и јавно претставување на кандидатите и нивните програми.

Првиот круг од изборите ќе се одржи на 19 октомври, а вториот на 2 ноември. Локалните избори 2025 се осми по ред од независноста на државата и четврти на кои граѓаните избираат градоначалници и советнички листи во сите 80 општини и во Градот Скопје.

Гласањето ќе се спроведе на 3480 избирачки места за 309 кандидати за градоначалници и 576 листи за општинските совети. Вкупниот број на кандидати изнесува 10 490.

На изборите учествуваат 22 партии, 19 коалиции и 119 групи на избирачи, односно независни кандидатури. Најмногу кандидати за градоначалници има во Градот Скопје – 16.

Локалните избори се организираат на секои четири години во втората половина на октомври. Локалната самоуправа е поделена на 80 општини и Градот Скопје, кој претставува посебна единица. Во неговиот состав се 10 општини со поделени надлежности.

Изборите ги распишува претседателот на Собранието со акт кој се објавува во Службен весник. Гласањето мора да се одржи најрано 70, а најдоцна 90 дена од распишувањето.

Локални избори во Македонија досега се одржале во 1996, 2000, 2005, 2009, 2013, 2017 и 2021 година.