Стабилна влада во Бугарија и средби со европските лидери се клучни за евроинтеграциите на Македонија, вели Николоски

Средбите како начин за дијалог и решенија

Во врска со неодамнешната средба меѓу претседателката Силјановска Давкова и лидерот на опозицијата Венко Филипче, Николоски изјави дека вакви состаноци се корисни за поттикнување на општествен дијалог.

„Не гледам ништо лошо во вакви средби. Форматот на класични лидерски состаноци можеби е застарен, но дијалогот е потребен,“ изјави министерот.

Тој потврди дека е можно да се организираат слични средби и со премиерот Христијан Мицкоски, што би придонело за подобра комуникација меѓу политичките субјекти.

Македонија и Бугарија: Предизвици со техничката влада

На прашањето за спорот со Бугарија и улогата на претседателските средби, Николоски нагласи дека Македонија и Бугарија се парламентарни демократии, каде владата има извршна моќ.

„Соседот е во тешка политичка ситуација. Бугарија помина низ седум изборни циклуси без да формира стабилна влада, а сега се очекува осми избори во март. Тешко е да преговарате со техничка влада која нема капацитет да презема обврски. Тоа што го гледаме е четврта година без стабилна влада кај нашиот сосед,“ истакна Николоски.

Тој додаде дека ваквиот вакуум претставува можност за Македонија да ги промовира своите позиции пред останатите членки на ЕУ.

ЕУ и проширувањето: Клучната средба со Макрон

Министерот го нагласи значењето на неодамнешната средба меѓу премиерот Мицкоски и францускиот претседател Емануел Макрон.

„Средбата помина во исклучително добар тон. Франција е еден од најважните актери во ЕУ, а ако успееме да ја убедиме Франција и неколку други западноевропски земји, нашите аргументи ќе станат посилни. Европа ако сака, ќе ги започнеме преговорите,“ истакна тој.

Николоски потенцираше дека Македонија нема проблем со најсилните членки на ЕУ, туку со една од најслабите, алудирајќи на Бугарија.

„Најсилните пет-шест земји не сакаат да се зборува за проширување во нивната домашна јавност, но со дипломатски ангажман и промена на атмосферата, едно дипломатски тешкаш може да го реши прашањето во Софија,“ заклучи министерот.

Уставни измени со одложено дејство

Во врска со поддршката за условите за уставни измени со одложено дејство, Николоски изјави дека квалитетот на преговорите е поважен од бројката на поддржувачи.

„Важно е да градиме конструктивни разговори со највлијателните земји. Ако успееме со Франција и другите западноевропски држави, нашите аргументи ќе бидат многу посилни,“ рече тој.