Ефективноста на третата доза на Фајзер и Модерна против коронавирусот е значително намалена до четвртиот месец по примањето на дозата на вакцината, се вели во новата студија објавена во петокот од американскиот Центар за контрола и превенција на болести (ЦДЦ).

До денес, научните докази покажаа дека ефективноста на вакцината се намалува по две дози, но релативно малку е пријавено за времетраењето на заштитата по третата доза.

Новата студија се заснова на податоци од повеќе од 241.204 посети на итната помош и 93.408 хоспитализации на возрасни со симптоми на ковид 19 во период од 26 август 2021 година до 22 јануари 2022 година.

Ефикасноста на вакцината е проценета со споредување на веројатноста за позитивен тест за коронавирус помеѓу вакцинирани и невакцинирани пациенти и користење на методи на статистичка контрола за календарската недела, географската област, соодветно на возраста, локалното ниво на пренос и карактеристиките на пациентот како што се коморбидитетите.

За време на периодот во кој доминираше омикрон, ефикасноста на вакцината, во случај на испитаници кои отишле во итна помош поради симптоми слични на ковид 19, била 87 проценти во првите два месеци по третата доза, но паднала на 66 проценти во четвртиот месец.

Ефикасноста на вакцината за хоспитализација беше 91 отсто во првите два месеци, но падна на 78 отсто до четвртиот месец по третата доза.

„Откритието дека заштитата што ја даваат вакцините базирани на мРНК ослабела во месеците по третата доза на вакцината, ја зајакнува важноста од понатамошно разгледување на дополнителни дози за одржување или подобрување на заштитата“, заклучуваат авторите на студијата.

Говорејќи на брифингот во Белата куќа за ковид во средата, главниот медицински советник на претседателот Џо Бајден, Ентони Фаучи, рече дека најверојатно ќе биде потребна четврта доза за подгрупи на луѓе со послаб имунолошки одговор, како што се постарите и имунокомпромитираните лица.

Во петокот, американската Администрација за храна и лекови (ФДА) одобри нов третман со лабораториски произведени антитела од фармацевтската компанија Лили наречен „бебтеловаб“.

Лекот се користи како интравенска инјекција и доби зелено светло за лекување на благ до умерен ковид кај луѓе постари од 12 години со висок ризик од тешка болест.

Клиничките испитувања на овие антитела покажуваат дека тие добро делуваат против омикрон.