Треба да ги изразиме сопствените ставови, ставовите на македонската историографија и да видиме кои се тие проблематични точки коишто едната страна ги смета за некакви конфликтни проблеми, вели во телевизиско интервју историчарот Митко Панов, кој е еден од новите членови на Заедничката мултидисциплинарна експертска комисија за историски и образовни прашања меѓу Северна Македонија и Бугарија.
Панов, во пресрет на утрешниот состанок со нивните колеги од бугарска страна, а кој доаѓа по подолг период, вели дека не може предвреме да каже за очекувањата од средбата, но, рече оти е оптимист доколку се постигнат начелата на слободно изразување на ставовите за историјата.
„За моите очекувања не можам ништо да кажам сега, пред време, бидејќи треба да се запознаеме, треба да ја запознаеме методологијата на работа, концептот на работа, принципите на делување. Јас претходно многу пати сум кажал дека не се согласувам со досегашниот концепт на работа на претходната комисија. Ќе видиме како понатаму ќе се делува“,рече Панов во вечерашното гостување во Дневникот на ТВ Сител.
Според него, она што е охрабрувачки е дека како тим на историчари се оставени слободно да ги изразуваат своите ставови и научни гледишта. Ова, како што рече Панов, им било кажано и на вчерашната средба со министерот за надворешни работи и надворешна трговија Тимчо Муцунски.
„Имавме протоколарна средба на која министерот беше дециден дека ние ако историчари и како комисија, формално сега, апсолутно имаме академска слобода на делување за какви било одлуки што ќе ги донесеме, ако ги донесеме, и за какви било дискусии во рамките на комисијата. Така што, тоа е за поздравување. Доколку се држиме до современите принципи на работа, европските практики на работа на ваков тип на комисии, можам да кажам дека сум оптимист, не дека нешто ќе се постигне, сега ќе видиме, но доколку ги постигнеме тие начела на работа, мислам дека ќе можеме слободно да ги изразуваме своите ставови и, впрочем, тоа е и целта на Комисијата и моето разбирање на комисијата“,додаде Панов.
Прашан дали ќе се држат до историските факти и толкувања, без оглед на исходот од работата на оваа комисија и дали за тоа добиле уверувања од министерот, Панов рече дека се растоварени од какви било политички влијанија и тоа според него е атмосфера во која треба да работи комисијата и да дискутира за историографски проблеми коишто се можеби продукт на 19 век.
„Ќе видиме како понатаму ќе се делува“,рече тој.
На почетокот на септември годинава Владата на затворена седница о избра новиот состав на Комисијата за историски прашања со Бугарија. За претседател беше назначен Ванчо Ѓоргиев, професор на Факултетот за историја во Скопје. Во новата комисија нема да биде дотогашниот претседател Драги Ѓорѓиев, кого премиерот Христијан Мицкоски го обвини дека не ги штител доволно националните интереси.
Други членови на комисијата се: Митко Панов, историчар од Институтот за национална историја; Никола Минов, професор по историја на Филизофскиот факултет; Сашо Додевски, насловен доцент од Институтот за историја на Филозофскиот факлтет; Бесник Емини, историчар од Институтот за духовно и културно наследство на Албанците во Скопје; и Димитар Љоровски, историчар, вработен во Институтот за национална историја.
Вчера министерот Муцунски имаше средба со старо-новиот состав на Комисијата на која, како што информираа од министерството, на членовите им било посочено дека одлуките и дискусиите треба да ги водат врз основа на научни аргументи и со целосно почитување на академската слобода.