Ристоска: Едукација за младите како основа за промени
Обвинителката Ленче Ристоска, која се обрати на настанот, ја нагласи важноста од образување на младите кои сакаат да се занимаваат со политика или да заземат клучни улоги во општеството.
„На корупцијата мора да ѝ се пристапи стратешки, но исто така треба да се развијат и конкретни вештини за справување со неа. Ова е проблем кој ги урива темелите на општеството, и затоа младите мора да бидат подготвени да дејствуваат ефикасно,“ изјави Ристоска.
„Мојот антикорупциски дневник“: Активност за младинска ангажираност
Проектот „Мојот антикорупциски дневник“ има за цел да ги научи младите не само да ја препознаваат корупцијата, туку и да ѝ оддолеат во секојдневниот живот.
„Се надеваме дека младите ќе се поттикнат да размислуваат за влијанието на корупцијата врз нив и врз луѓето околу нив. Преку проектот, сакаме да видиме зголемена ангажираност во процесите на транспарентност и отчетност од институциите,“ изјави Вирџинија Елиот, директорката на Канцеларијата за меѓународна борба против наркотици и спроведување на закони (ИНЛ) при Амбасадата на САД.
Обуките како основа за ефикасна борба против корупцијата
Судијата Бетим Јахја истакна дека младите мора да се стекнат со конкретни обуки за да бидат подготвени да го адресираат овој општествен проблем, кој станува сè поголема закана.
„Без правилна обука, младите нема да имаат алатки за ефикасно справување со корупцијата. Тие мора да бидат двигатели на промените во општеството,“ порача Јахја.
Корупцијата останува слабост според извештаите на ЕУ
Борбата против корупцијата со години е нотирана како една од најголемите слабости на земјата во извештаите на Европската Унија. Овој предизвик, заедно со ниската доверба во судските инстанции, укажува на потребата од поактивно вклучување на сите генерации, особено на младите, во процесите на реформи и барање одговорност.
„Мојот антикорупциски дневник“ е важен чекор кон зајакнување на капацитетите на младите за препознавање. справување и борба со корупцијата. Со поддршка од локални и меѓународни експерти, проектот има за цел да ги поттикне младите на акција и да промовира транспарентност и отчетност во сите аспекти на општествениот живот.