На Халкидики, веројатно поради удари на гром предизвикани од невремето, вчера избија пет пожари во поширокиот регион на Касандра и Ситонија, а активен е само шумскиот пожар во Фурка, каде што интервенираат 76 пожарникари со четири пешадиски тимови, со 29 возила и по еден авион и хеликоптер.
За конкретниот пожар на Твитер објави и заменик-претседателот на Европската Комисија Маргаритис Схинас, кој напиша дека со итната мобилизација на пожарникарите, цивилната заштита и волонтерите, се избегна најлошото.
Дождот во текот на ноќта помогна и им ја олесни работата на пожарникарите во северниот дел на Евија, кои од 3 август се обидуваат да ги стават под контрола огнените јазици.
И понатаму интервенираат голем број пожарникари, вкупно 858, како од Грција, така и од Србија, Романија, Полска, Словачка, Украина и Молдавија, а од воздух, пожарот се гаси со четири хеликоптери и три авиони од кои два се руските Ил-76 и Бериев-200.
Со мали жаришта, активен е и пожарот во западниот дел на Пелопонез, каде што интервенираат 678 пожарникари со 30 пешадиски тима и 218 возила, а во справувањето со огнената стихија, помагаат и противпожарните сили од Чешка, Велика Британија, Франција, Германија и Австрија.
Од воздух, пожарот се гаси со три авиони и два хеликоптери.
За катастрофалните пожари што мината седмица ја зафатија Грција и предизвикаа материјална штета, грчкиот премиер Кирјакос Мицотакис, денеска ќе одржи прес конференција.