Неколку стотици лица вчера протестираа во Луксембург против мерките воведени поради коронавирусот, јавија француските медиуми, додавајќи дека полицијата која го обезбедуваше протестот употребила водени топови и го растурила собирот, притоа апсејќи и неколку демонстранти.
Хеликоптери и дронови ги надлетуваа демонстрантите кои извикуваа „Слобода“, а на помош на луксембуршката полиција дојде и полицијата од соседна Белгија, поради нередите што на сличен собир избија на 4 декември.
Полицијата ја истурка групата демонстранти кои фрлаа петарди и димни бомби во поставените полициски барикади во центарот на градот.
Приведени се повеќе од 10 лица.
Властите ги заострија мерките против коронавирусот. Во Луксембург е задолжителна ковид пропусницата за влез во згради во кои се сместени културни и забавни настани.
Ковид пропусница или негативен тест за коронавирус од 15 јануари ќе бидат задолжителни и за вработените во сите фирми.