Спречен увоз на над 26 тони замрзнато пилешко месо од Бразил
Инспекциските служби на Агенцијата за храна и ветеринарство спречија увоз на над 26 тони замрзнато пилешко месо од Бразил на граничниот премин Ќафасан. Пратката, составена од 2.167 пакувања со тежина од по 12 килограми, не ги исполнила условите за увоз и е вратена во земјата извозник.
Забрана поради ризик од авијарна инфлуенса
Од АХВ информираат дека одлуката за забрана е донесена врз основа на претходно решение за забрана на увоз на живи животни, како и производи и нуспроизводи од животинско потекло од Бразил. Мерката е преземена со цел спречување на внесување на вирусот на високо патогена авијарна инфлуенса, позната како птичји грип.
Неисполнети услови за датумот на производство
Согласно важечките правила, забранет е увозот на пратки добиени од животни кои се заклани, натоварени и сертифицирани пред 1 август 2025 година. Поради неусогласеност со овие услови, спорната пратка не била пуштена во промет на територијата на државата.