Алаѓозовски на средба со претставници на влашката заедница побара поддршка за Пописот

На оваа средба, со која е заокружена серијата разговори со сите немнозински заедници во нашата држава, е упатена порака за потребата од широка поддршка од сите заедници за претстојниот Попис, зашто тој е многу важна операција за добивање статистички податоци со кои ќе се лоцираат потребите од преземање мерки за подобрување на квалитетот на живот на сите категории граѓани.

– Учесниците на состанокот се согласија дека спроведувањето успешен Попис е важен сегмент и едногласно упатија порака дека е многу важно секој граѓанин да учествува и да се попише и само така ќе се добијат податоците за демографската, образовната, социјалната структура, што понатаму значи добивање бројки кои подоцна ќе помогнат за планирање и економски развој, информира Прес-службата на Владата.

На состанокот присуствуваше и Јасмина Ѓоргиева, координатор на Секторот за дисеминација и односи со јавноста во Државниот завод за статистика која, како што е наведено во соопштението, се осврна на тековните активности за спроведување на пописот, со посебен акцент на здравствениот протокол, со што се гарантира безбедноста и на попишувачите, и на граѓаните при целиот процес. Тоа подразбира носење заштитни маски, одржување дистанца и обезбедување средства за дезинфекција.

Ѓоргиева одговараше на прашања поврзани со спроведувањето на Пописот, конкретно при попишувањето на можноста за користење седум јазици предвидени во Уставот на Македонија, односно македонски, албански, турски, ромски, влашки, српски и босански, со детали за техниката на попишувањето.

– Присутните изразија задоволство во поглед на констатацијата дека Пописот е статистичка обемна операција, организирана според светски стандарди, која гарантира безбедност на сите лични податоци. На состанокот беше констатирано дека Пописот е особено важен за припадниците на влашката заедница, дека е крајно време и не смее ни ден повеќе да се чека за да се обезбедат статистички податоци во насока на целосно имплементирање на заложбата на Владата за „Едно општество, еднакво за сите“, наведува владината Прес-служба.