Директорот на Бирото за јавна безбедност, Александар Јанев, ја истакна својата посветеност на продолжување на борбата против криминалот и корупцијата. Јанев нагласи дека ќе се продолжи со чистењето на државата од поединци кои ја злоупотребуваат јавната функција за лична корист. Ова го кажа по успешната акција за откривање на мрежа која злоупотребувала јавната служба,
„Во текот на вчерашниот ден, реализиравме нов случај на незаконско и коруптивно работење. Беше откриена мрежа на лица од здравствениот сектор и приватни дејности кои со години злоупотребувале јавната служба. Тие се здружиле за да фалсификуваат документи, дијагнози и мислења. Овозможиле луѓе кои не ги исполнувале условите да добијат државна помош“, изјави Јанев.
Како дел од нивната мрежа, злоупотребувачите добивале парични средства за туѓа нега или инвалидска пензија, што претставува тежок удар врз јавните фондови, кои се финансираат од трудот и даноците на чесните граѓани.
„Мрежата се збогати на сметка на сите нас. Но, ние како БЈБ продолжуваме да се бориме против овие појави и да ги разоткриваме оние кои ја користат својата позиција за лична добивка. Борбата против криминалот е нашата должност, а криминалот не е исплатлив“, додаде Јанев.
Се очекува дека оваа акција ќе биде само една од многуте во напорите за враќање на довербата во институциите и правосудниот систем, за создавање на сигурна и правична иднина за сите граѓани на Македонија.
Извор: Република