Симптомите често личат на вирус, но траат подолго
Со затоплувањето и престојот на отворено, кај многу деца се појавуваат тегоби што наликуваат на настинка. Сепак, во овој период од годината причината често е сезонска алергија, а не вирусна инфекција. Поленот од дрвјата и тревите се задржува во воздухот и лесно навлегува во дишните патишта.
Организмот на децата со почувствителен имунолошки систем реагира поинтензивно на овие честички. Најчести предизвикувачи се поленот од бреза, лешник, евла и различни треви. Ризикот е поголем ако во семејството има историја на алергии, астма или атопичен дерматитис.
На што треба да внимаваат родителите
Алергиските реакции најчесто започнуваат нагло и траат подолго од вообичаена настинка. Карактеристични симптоми се:
– често и повторувачко кивање
– бистар и воден исцедок од носот
– затнат нос без покачена температура
– чешање на носот, очите или грлото
– солзење и црвенило на очите
– сува и надразнувачка кашлица
За разлика од вирусните инфекции, кај алергијата обично нема треска, болки во мускулите или изразена општа слабост.
Настинката најчесто поминува за седум до десет дена. Алергиските симптоми можат да траат со недели, па и месеци, особено ако детето секојдневно е изложено на полен. Често се влошуваат по игра на отворено, а се намалуваат кога детето е во затворен простор.
Кога е потребна лекарска консултација
Доколку тегобите продолжат повеќе од две недели или влијаат на сонот и секојдневните активности, препорачливо е да се побара совет од педијатар. Лекарот може да предложи антихистаминици, назални спрејови или дополнителни испитувања.
Ако се појават отежнато дишење, свирење во градите или ноќни напади на кашлица, потребно е да се исклучи можноста за алергиска астма.
Родителите можат да помогнат и со едноставни мерки дома. Просториите треба редовно да се проветруваат, но не во раните утрински часови кога концентрацијата на полен е највисока. По престој надвор, детето треба да ја измие косата и да облече чиста облека. Алиштата е подобро да се сушат во затворен простор. Испирањето на носот со физиолошки раствор може да ја намали иритацијата и да го олесни дишењето.