Зголемените вложувања во истражување и развој доаѓаат во година во која „Алкалоид“ очекува консолидирани приходи од околу 361 милион евра, што претставува раст од 7 проценти во однос на 2025 година. Доминирачкиот дел од продажбите – 91 процент – и натаму ќе доаѓа од фармацевтскиот сегмент, додека хемијата, козметиката и билкарството учествуваат со 9 проценти. Извозот останува главен двигател на растот, со очекувани 66 проценти од вкупните приходи, наспроти 34 проценти на домашниот пазар.
Планираните финансиски резултати за 2026 година предвидуваат и раст од 8 проценти на EBITDA, како и најмалку 7-процентно зголемување на консолидираната нето-добивка. Овие проекции се поткрепени со континуиран инвестициски циклус, кој во изминатите две децении надмина 250 милиони евра.
Само во последните години, компанијата инвестираше во нови производствени погони, магацински капацитети и технолошки линии, сите усогласени со највисоките GMP-стандарди. Во 2025 година беше пуштена во употреба и новата микробиолошка лабораторија за контрола на квалитет, со капацитет за околу 20.000 анализи годишно и 21 високообразован вработен, инфраструктура што директно го поддржува растот на истражувачките активности.
За 2026 година е планирано околу 8 проценти од консолидираните приходи од продажби да се инвестираат во материјални и нематеријални средства, што дополнително ја зацврстува позицијата на „Алкалоид“ како една од најинвестициски активните компании во земјава.
Покрај технолошкиот и финансискиот развој, компанијата најавува и нови вработувања, околу 50 во земјата и во странство, како и продолжување на вложувањата во обуки, развој на кадар и раст на просечната нето-плата. Паралелно, ESG-стандардите сè поцврсто се интегрираат во корпоративното управување, со фокус на одговорност кон животната средина, вработените и заедницата.
Со зголемените вложувања во истражување и развој, „Алкалоид“ смета дека растот во 2026 година нема да се темели само на обем, туку и на знаење, иновации и производи со повисока додадена вредност, стратегија што треба да обезбеди одржлива конкурентност и на подолг рок.