Во текот на летото 2024 година раководството на Баерн Минхен донесе одлука да му ја додели тренерската позиција на Винсент Компани. Иако назначувањето на белгискиот стручњак претставуваше големо изненадување за јавноста, по две и пол години се покажа дека тоа бил одличен потег за баварскиот тим.
Изминатите денови беа неизвесни во Минхен откако Компани колабираше за време на тренинг, но лекарите утврдија дека се работи за менингитис. Тој веќе е пуштен на домашно лекување и се очекува да се врати на терените значително порано од првичните проценки кои најавуваа пауза до крајот на годината.
Баерн во меѓувреме забележа убедлива победа од 6:1 над тимот на Магдебург во рамките на осминафиналето од Купот на Германија, предводен од асистентот Ерон Денкс. Спортскиот директор на клубот, Макс Еберл, во интервју откри детали и анегдоти од преговорите за ангажманот на Компани по заминувањето на Томас Тухел.
„Кога дојдов во клубот, веќе беше познато дека тренерот заминува на крајот од сезоната. Но, не знам какви ќе беа реакциите ако го претставив Винсент Компани како мој прв кандидат. Тренерот кој испадна од лигата со Барнли за да го наследи Томас Тухел… Секако, го разгледавме списокот на кандидати; Јулијан Нагелсман беше еден од нив, тоа не е тајна. Имав многу добар однос со него, но тој се одлучи за ФС Германија. И Ралф Рангник отиде во спротивна насока“, вели Еберл.
Еберл објасни дека клупското раководство детално го следело пазарот и собрало исклучително позитивни информации за работата на белгискиот менаџер во Барнли, по што следувале и првите контакти.
„Во тој момент многу внимателно го анализиравме пазарот и сè што слушнавме за младиот менаџер на Барнли беше позитивно. Во еден момент реков: „Ајде да го повикаме Вини“. Разговаравме пред нашиот полуфинален натпревар од Лигата на шампионите во Мадрид. По четири часа морав да го прекинам бидејќи имав состанок. Ја спуштив слушалката и си помислив: „Вау, ова изгледа добро“. Потоа го замолив Кристоф Фројнд исто да разговара и тој се врати со истиот заклучок. Тој беше убеден дека Компани е вистинскиот човек за работата“, вели Еберл.
Пред да пристигне во Баерн, Компани работеше во белгиски Андерлехт, а потоа го предводеше Барнли до пласман во англиската елита освојувајќи 101 бод, по што веднаш испадна од најсилното друштво. Баварците ги ценеле неговите тактички принципи и побарале совет од Пеп Гвардиола.
„Тој го водеше Барнли до промоција во Премиер лигата со 101 бод, а потоа испадна од лигата. Човек би помислил дека нема да успее во Баерн, дека ќе има проблем со адаптација, но ние ги гледавме работите поинаку. Тој има јасна претстава за фудбалот. Не сакаше да седи мирно на клупата на Барнли и да игра против милијардерските тимови Манчестер Сити и Ливерпул со осум играчи во одбраната, надевајќи се на бод. Победи, што беше плус за мене. Освен тоа, знаев дека Пеп Гвардиола го имаше Вини на својот список кога го напушти Сити. Затоа му предложив на Карл-Хајнц Румениге, кој има добри односи со нив, едноставно да го повика Пеп за мислење. Два часа подоцна добив одговор: „Добро, ќе го направиме тоа““, вели Еберл.
Спортскиот директор исто така опиша како изгледала завршницата од преговорите во домот на Компани во Манчестер, кога морал директно да изврши притисок за потпишување на договорот.
„Летавме за Манчестер на последниот состанок. Во три часот наутро, Вини рече: „Добро, сакам да спијам и да разговарам со сопругата“. Легнав на неговиот кауч и тој ме праша што правам. „Ули рече дека не можам да ја напуштам твојата куќа додека не потпишеш“, реков. Тој рече: „Добро, Макс, ќе го направам тоа, само дозволи ми да поразговарам уште еднаш со сопругата“. Потоа ме турна надвор“, вели Еберл.