„Пристапувањето кон СЕПА претставува историски напредок на патот кон Европската Унија. Потврда за реформите коишто ги предводеше Народната банка за исполнување на високите европски регулативни барања и стандарди во доменот на плаќањата. Народната банка и натаму посветено ќе работи на одржувањето на макроекономската стабилност. Како и на надминувањето на предизвиците во сите области на делување заради овозможување усогласеност со европските стандарди.“
Ова беше посочено на состанокот меѓу гувернерката на НБРМ Анита Ангеловска-Бежоска и директорката за Западен Балкан при Генералниот директорат за проширување и источно соседство при Европската комисија, Валентина Суперти.
На состанокот се зборуваше и за натамошните активности во доменот на пристапувањето кон СЕПА. Со што им се овозможува на нашите банки, и покрај тоа што не сме членка на ЕУ, да пристапат до европските платежни системи. Сепак, за користење на придобивките од СЕПА треба да се надминат и сегашните предизвици.
Гувернерката посочи дека централната банка заедно со банкарскиот сектор посветено работи на обезбедување целосна подготвеност за интегрирање во СЕПА до октомври 2025 година. Тоа е првиот можен датум за влез на банките од земјите од Западен Балкан.
Во соработка со меѓународните партнери, централната банка ќе го поттикнува и ќе го олеснува овој премин. Обезбедувајќи техничка поддршка и регулаторен надзор за непречен и ефикасен процес на интеграција на банките.
Гувернерката Ангеловска-Бежоска ја запозна директорката Суперти со последните макроекономски показатели. А, тие упатуваат на зајакната макроекономска стабилност, како и зајакната стабилност на банкарскиот систем.
Ангеловска-Бежоска и Суперти искажаа заемно задоволство од спроведувањето на проектните активности на Народната банка со поддршка од ЕУ . Тие се однесуваат за усогласување со највисоките европски стандарди и регулативи и изразија цврсти заложби за продлабочување на соработката.