Лидерот на Левица, Димитар Апасиев на социјалните мрежи напиша дека дава поддршка на новинарот Фуркан Салиу кој попладнево беше уапсен поради напад на полицајци, по што , според МВР, му беше пронајден и пишол во неговото возило.
Ова со апсењето на новинарот ФУРКАН САЛИУ ви е показна вежба шо ќе им се дешава на новинарите кои ќе откриваат корупција ко ќе имате вмроиден министер за внатрешни, напиша Апасиев на ФБ.
Инаку денеска на фудбалскиот стадион во с. Средно Коњари за време на фудбалскиот натпревар помеѓу ФК “БВК Коњаре” и ФК “Куманово”, на дваесетина минути пред крајот на натпреварот дошло до обид домашната публика да се пресмета со гостинските играчи.
Обидот е спречен од страна на службите кои го обезбедуваа натпреварот и натпреварот бил прекинат.
За време на интервенцијата, од страна на две лица нападнати се припадници на Единицата за брзо распоредување. Лицата кои го извршиле нападот веднаш се приведени и утврдено е дека станува збор за Ф.С.(33) од с. Арачиново и Н.Ј. (26) од с. Арачиново, додека С.Б. (40) од с. Арачиново е приведен за учество во тепачка.
Дополнително, околу 18 часот, при преглед на патничко возило “дачија дастер”, сопственост на Ф.С., а управувано од Ф.А.(34) од с. Кондово со сопатник А.Р. (21) од с. Кондово, во багажникот е пронајден пиштол.
СВР Скопје презема мерки за целосно расчистување и документирање на случајот.