„Визер“: Летовите од Скопје и Охрид се одвиваат непречено по софтверското ажурирање
Од унгарската нискобуџетна авиокомпанија „Визер“ информираат дека нема никакви пореметувања во сообраќајот од скопскиот и охридскиот аеродром. Според нивното официјално соопштение објавено на социјалните мрежи, софтверското ажурирање на сите авиони од фамилијата „ербас 320“ е успешно извршено, пренесува СДК.
Софтверот ажуриран на целата флота
„Ажурирањето на софтверот успешно е имплементирано во текот на ноќта на сите засегнати авиони од фамилијата ‘ербас А320‘. Сите летови се одвиваат без прекини“, наведе компанијата. „Визер“, која во Скопје има стационирано пет авиони од типот „ербас А321 нео“ и учествува со околу 60 проценти од авиосообраќајот во земјава, лета исклучиво со авиони од фамилијата „ербас 320“.
Одлуката на „Ербас“ за привремено приземјување
Во меѓувреме, производителот „Ербас“ најави привремено приземјување на околу 6.000 авиони, откако било утврдено дека силна сончева радијација може да влијае врз системите за контрола на летот. Се очекува авионите да се вратат во употреба по брзо софтверско ажурирање. Проблемот бил откриен за време на истрага поврзана со инцидент во кој авион на „ЏетБлу“, на лет од САД кон Мексико, нагло изгубил висина и принудно слетал во Флорида, при што биле повредени најмалку 15 патници.