Бериша тврди дека успехот на Рама е „најголема измама“
Лидерот на Демократската партија и поранешен шеф на државата, Сали Бериша, обвини дека премиерот Еди Рама го враќа интегративниот процес на Албанија во 1992 година. Според него, Албанија апсолутно не ги исполнува условите за евроинтеграција.
„Денеска го изјавувам она што во последните две – три години десетици пати сум го кажал. Албанија апсолутно не исполнува ниту еден услов од процесот за евроинтеграција. Успесите на Албанија со Еди Рама се најголемата измама. Албанија го исполнува геостратешкиот услов, што е важен услов,“ рече Бериша.
Тој истакна дека Демократската партија останува посветена на европската интеграција, но само врз основа на заслуги. Бериша посочи дека главната цел на ДП е интеграцијата на Албанија во ЕУ и дека тоа го гарантира пред партнерите на земјата.
Повик за „мирно востание“ и критика на Уставниот суд
Бериша ги повика граѓаните да учествуваат на утрешниот трет по ред национален протест пред Владата во Тирана, нарекувајќи го „мирно востание“.
„Ги поканувам граѓаните од цела Албанија, ги поканувам сите граѓани на Тирана на мирно востание, за да им докажеме на нацијата, на Европа и на светот дека никогаш нема да бидеме поразени од неколку крадци кои немаат други интереси освен сопственото збогатување,“ рече Бериша.
Понатаму, тој ја коментираше одлуката на Уставниот суд во врска со суспензијата на министерката Белинда Балуку. Бериша го опиша процесот како доказ за политичкото влијание на Владата врз правдата. Според него, фактот што судот бил поделен четири – четири при гласањето, ја покажува „неговата парализа од страна на извршната власт.“