Од денеска стартува системот „Сејф сити“, без парични казни до Нова година
Од денеска официјално почнува да функционира системот „Сејф сити“ во рамки на проектот „Безбеден град, безбедна држава“. Во претстојните недели камерите автоматски ќе ги регистрираат сообраќајните прекршоци, но во пробниот период до Нова година возачите ќе добиваат само предупредувања, без изрекување казни. Од јануари казнената политика целосно стапува во сила.
Кои прекршоци ќе се регистрираат?
Во првата фаза системот ќе ги бележи прекршоците како возење со брзина над дозволената, поминување на црвено светло, возење со истечена сообраќајна дозвола и непрописно паркирање. Предвидено е подоцна електронскиот надзор да опфати поширока група сообраќајни прекршоци.
Камери низ државата и целосна примена од јануари 2026
МВР веќе поставува опрема во Скопје, Тетово и Куманово, како и на автопатите и експресните патишта долж коридорите 8 и 10. До средината на 2026 година системот треба да ја опфати целата држава, со цел воспоставување поуреден и побезбеден сообраќај. Од 1 јануари 2026 година сопствениците на возилата ќе добиваат СМС и електронска пошта со записник и платен налог, при што во првите осум дена ќе биде можно плаќање на половина од казната.