Бујар Османи кандидат за Чаир на локалните избори, поддржан од коалицијата Европски фронт предводена од ДУИ
Бујар Османи ќе биде кандидат за Чаир и ќе биде поддржан од коалицијата Европски фронт, предводена од Демократската унија за интеграција (ДУИ), за време на следните локални избори.
„Ќе бидам кандидат за градоначалник на општина Чаир под знамето на Европскиот фронт“, изјави Османи на вонредниот Конгрес на ДУИ, кој се одржа во неделата.
Во своето обраќање, Османи истакна дека токму од оваа општина започнала и неговата политичка кариера. Тој подвлече: „Чаир е мојот политички темел. Од овде почнав, овде ќе се вратам и ќе продолжам“.
Тој додаде дека кандидатурата ја гледа како обврска, но и како чест, а воедно и како можност да ги искористи сите свои искуства од изминативе 20 години во власта.
„Верувам дека Чаир заслужува посебно внимание. Заслужува да биде центар на политичко и национално дејствување“, потенцираше Османи во говорот.
ДУИ најави дека и на следните локални избори ќе настапи во рамки на коалицијата Европски фронт. Од партијата истакнаа дека Европскиот фронт е платформа за заедничко политичко дејствување на Албанците во земјата.
На вонредниот Конгрес, Али Ахмети беше избран за почесен претседател на ДУИ, а Артан Груби доби функција организациски секретар.
Партијата најави целосна реорганизација, нови тела и кадровски промени, по што ќе следува изборен конгрес во декември.