Бурни реакции по назначувањето на Рамчиловиќ за амбасадор во Црна Гора

Министерот Бујар Османи на брифингот за активностите на МНР соопшти четири амбасадорски имиња.

Нови амбасадори се Цуфи Исмаили во Брисел, во Анкара заминува поранешниот министер за одбрана и екс лидер на ЛДП Јово Манасиевски.

Актуелниот директор на тајната служба АНБ Виктор Димовски ќе биде амбасадор во Париз, Франција. Предлогот беше познат од порано, а ќе треба да се избере нов директор на Агенцијата за национална безбедност.

Ново име на листата е пратеникот Зекир Рамчиловиќ кој е избран за амбасадор во Подгорица, Црна Гора.

По овие информации , во јавноста се појавија бурни реакции за имињата кои се праќаат за амбасадори, а реагираа и од ВМРО ДПМНЕ. Од таму велат дека Рамчиловиќ е доказ за партизираната дипломатија и како преку распродажба на државните интереси се добиваат функции

Со поставувањето на Зекир Рамчиловиќ за амбасадор во Црна Гора владата на СДС и ДУИ продолжува да ја понижува и деградира македонската дипломатија. Наместо соодветен кадар кој достојно ќе ја претставува Македонија, власта за амбасадор поставува свој партиски послушник кој од дипломатија разбира само продажба на државните интереси на Македонија и преговори за фамилијарни вработувања, велат од партијата.

Така откако гласаше за промена на името на Република Македонија, СДС прво го награди Рамчиловиќ и го стави пратеник, а потоа наградата се прошири и за неговото семејство.Најпрвин си ја вработи сопругата на висока позиција во МВР, а потоа и неговиот син го вработи како полицаец. Очигледно е продажбата на државните интереси има цена, а цената на Рамчиловиќ е амбасадорско место и вработувања на семејството.Ваквите постапки на СДС и ДУИ се уште една причина зошто не смеат повеќе да останат на власт. Затоа се потребни предвремени парламентарни избори, нагласуваат од ВМРО ДПМНЕ.