Црна Гора во следните четири години мора да врати две милијарди и 648 милиони евра стари долгови, а се уште не се знае како ќе ги обезбедат парите за тоа.
Во Министерството за финансии велат дека најголемите обврски се должат на државните обврзници кои доспеваат, додека економистите предупредуваат дека црногорската држава ќе мора да влегува во нови, уште поскапи долгови без да ја намали јавната потрошувачка и да ја развива економијата.
Јавниот долг на Црна Гора на крајот на минатата година изнесувал четири милијарди и 102 милиони евра, во кој се вклучени и долговите на општините. Од Министерството за финансии наведуваат дека за три месеци од годинава успеале да исплатат 44 милиони евра стари обврски, но во истиот период позајмиле нови 100 милиони кај Дојче банк.
„Најголеми обврски се обврските по еврообврзници во износ од 1,75 милијарди евра, обврските кон деловните банки во износ од 420 милиони и обврските кон кинеската Ексим банка за автопат“, вели Светлана Вукиќевиќ, пренесува РТЦГ.
Црна Гора во следните четири години треба да врати две милијарди и 648 милиони евра стари долгови. До 2025 година само за камати ќе се потрошат над 300 милиони.
„Враќањето во 2024 година е 537 милиони, во 2025 година кога имаме еврообврзница од 500 милиони имаме 855 милиони отплати и во 2026 година отплатата на долгот е 306 милиони. Но, во 2027 година не чека значителен скок поради долгот од 2020 година, а има долг од 950 милиони“, вели Вукиќевиќ.
Од кои извори ќе се финансираат долговите и редовните обврски се прашања на кои засега никој не се осмелува да одговори.
Економистите предупредуваат дека не е во прилог на земјава што во последните години се зголемува јавната потрошувачка, како и тоа што немаме долгорочно управување со јавните финансии.
„Кога имате зголемени плати, ја доведувате државата во ситуација да не може да ги врати долговите што ќе ни дојдат во наредниот период. Ми се чини дека во следните шест години ќе треба да вратиме еден од БДП на Црна Гора само за да ги вратиме долговите“, истакнува Мирза Мулешковиќ.
Тоа, како што посочува Мулешковиќ, јасно укажува дека ќе треба да ја почнеме економијата за редовно да ги сервисираме сите отплати.
Најзадолжени земји од Европската унија се Грција, Италија и Шпанија, чиј јавен долг е далеку над критериумите од Мастрихт од 60 отсто од бруто националниот производ.
Јавниот долг на Црна Гора е 70,7 отсто од БДП, а Мулешковиќ не ја исклучува соработката со ММФ за намалување на долгот и трошењето.