Македонскиот туристички сектор побара од Грција привремено да ја одложи примената на новиот систем за влез и излез ЕЕС за македонските граѓани во текот на летото. Барањето доаѓа пред почетокот на туристичката сезона, кога најголем дел од аранжманите се поврзани со грчките плажи.
Од Туристичката комора при Сојузот на стопански комори побарале системот да не се применува од 1 јуни до 1 септември 2026 година. Причината е стравот дека биометриските проверки може да создадат долги колони и повеќечасовно чекање на границите. Системот, кој го воведе Европската Унија, предвидува електронска регистрација со фотографија и отпечатоци од прсти.
Првите искуства веќе покажале забавување на процедурите, особено кај автобуски групи. Сепак, според информациите, европските правила не дозволуваат целосно сезонско изземање на одредени државјани, туку само ограничена флексибилност во исклучителни ситуации.