Вонредна седница поради растот на цените на горивата
Поради најавениот раст на цените на горивата, Владата денеска напладне ќе одржи седница на која ќе се донесат мерки за ублажување на ценовниот скок. Оваа одлука следи во услови кога цените на светските нафтени берзи се во пораст, што се очекува дополнително да влијае и врз домашниот пазар.
Иако на бензинските станици во земјава горивата се меѓу најевтините во регионот, се очекува во понеделник ново зголемување на цените на дизелот и бензините. Поради тоа, Владата закажа седница во 12 часот, на која ќе се донесат вонредни мерки за справување со високите цени, со цел да се ублажи ценовниот удар, брифираа вчера од Владата.
Поевтинување кај дел од компаниите
Од 18 март годинава, на бензинските пумпи на ОКТА, Пуцко Петрол, Макпетрол и Лукоил се точи гориво поевтино за два денара од максималната цена утврдена од Регулаторната комисија за енергетика. Ова намалување следува откако ОКТА понуди пониски цени за трговците со нафтени деривати и започна испорака на гориво по пониски цени.
На 13 март, министерката за енергетика Сања Божиновска и директорот на ОКТА, Димитриос Пасхос, на прес-конференција најавија дека до крајот на месецот компанијата ќе ги намали цените на дизелот и бензините за трговците за два денара. Со ова, трговците на големо и мало добија можност ова намалување да го пренесат во крајните цени за потрошувачите.
Пасхос тогаш посочи дека трговците самостојно ќе ги утврдуваат продажните цени, во согласност со нивните комерцијални политики и пазарните услови.
Раст на цените и глобални причини
Со последните две корекции на цените од страна на Регулаторната комисија за енергетика, дизелот поскапе за 21 денар по литар, додека бензините се зголемија за 12 денари.
Причина за овие поскапувања, како на домашниот така и на глобалниот пазар, се случувањата на Блискиот Исток, кои влијаат врз движењата на цените на нафтата.