Цветан Трипуновски остро реагираше на изјавите на Венко Филипче, обвинувајќи го за дезинформација и потсетувајќи дека токму владата на која Филипче припаѓал донела законски решенија со кои се нанела штета на земјоделците. „Филипче дали воопшто знае кои закони ги имаат донесено како влада и која штета ја имаат направено врз земјоделците?“, праша Трипуновски.

Министерот за земјоделство, шумарство и водостопанство наведе дека токму во времето на СДС била усвоена одредбата од Законот за вино што им дозволувала на винариите да кратат по 8% од цената на грозјето. „Да го потсетам Филипче дека оваа одредба е донесена во времето на СДС и неговата влада“, истакна тој, додавајќи дека лозарите добро паметат и откупни цени од тој период, кога грозје дури и се истурало пред винариите.

Трипуновски праша зошто, иако СДС биле седум години на власт, не утврдиле повисока заштитна цена за лозарите. „Како се сети на нив по само една година опозиција тазе вратен од крстарење по Егејското море?“, напиша тој.

Министерот нагласи дека во краткиот период на сегашната влада се реализирале значајни мерки за земјоделците. Според него, исплатени се над 11 милијарди денари за заостанати и тековни обврски, субвенциите се исплаќаат редовно, објавен е јавен повик за инвестиции во опрема за производство на вино, алкохолни пијалоци и пиво од мал обем, а се подготвува и закон за жестоки пијалоци.

„Утврдивме највисока откупна цена за Вранец и Смедеревка. За потсетување, една од првите подзаконски акти беше Методологијата, објавена во Службен весник бр. 146/2024 од 12.07.2024“, додаде Трипуновски.

Тој посочи дека се оспособени и системите за наводнување, кои според него биле нефункционални поради негрижата на СДС. „Земјоделството е приоритет на Владата. Земјоделците сега имаат вистински партнер“, порача министерот.

Во реакцијата упати и лични критики кон Филипче. „Двете лица на Филипче. Кога ветува како опозиција и кога трупа богатство како власт, за потоа да ужива на јахти како опозиција додека ветува сè и сешто. Ова е истата приказна – лажна, лицемерна, која ви ветуваше живот, чиј дел беше Филипче со неговиот ментор, а донесе пустош, криминал и предавства“, напиша Трипуновски.

Тој заврши со порака дека народот нема да дозволи повторно да биде измамен. „СДС очигледно не се менува. Останува заглавен во минатото, надевајќи се дека народот има кратко помнење и ќе им ги заборави злоделата. Филипче, Македонија памети и нема да ви заборави“, стои во неговата реакција.