Ресен, 21 септември 2024 – Министерот за земјоделство, шумарство и водостопанство, Цветан Трипуновски, објави дека е постигнат договор за минималните цени за откуп на јаболка од реколтата 2024 година. Преку заедничка соработка со откупувачите, цените за откуп на оваа аграрна култура се утврдени и ќе стапат на сила од понеделник.

Минимални цени и следење на откупот

„Откупувачите ги објавија цените, кои од понеделник ќе бидат јавно истакнати на сите откупни места. Она што можам да го ветам на земјоделците е дека процесот ќе биде надгледуван од Земјоделскиот инспекторат, со цел сè да се одвива во согласност со законите и договорените процедури,“ изјави министерот

Тој додаде дека Министерството ќе внимава да се почитуваат сите процедури при откупот на земјоделските производи, особено за јаболките, кои се важен извозен производ.

„Денеска одржавме втора средба во рок од 10 дена, на која дискутиравме за пласманот на јаболката од реколтата за 2024 година. Заедно со откупувачите, договоривме минимални цени кои ќе важат на почетокот на откупот за оваа реколта,“ изјави министерот за земјоделство, шумарство и водостопанство, Цветан Трипуновски, по состанокот со откупувачите на јаболка во Ресен.

Корекции на цените според пазарните услови

Трипуновски изјави дека цените на јаболката ќе бидат подложни на корекции според побарувачката на пазарот.

„Се очекува дека доколку има потреба, ќе има корекција на цените, при што ќе се следат глобалните и локалните пазарни трендови за оваа овошна култура,“ додаде тој.

Соработка помеѓу земјоделците и откупувачите

За првпат, земјоделците и откупувачите заедно преговараа и постигнаа договор за минимални цени.

„Ова е важен чекор за фер пазар, каде што интересите на земјоделците и откупувачите се почитуваат подеднакво,“ појасни министерот. Тој ги охрабри земјоделците да се обратат до Министерството доколку имаат проблеми со откупот на јаболката или со други земјоделски производи.

Постигнати договори за цените

Според еден од присутните откупувачи, минималната цена за сортата Ајдарет од прва класа е утврдена на 18 денари, додека другите сорти ќе се движат од 20 до 22 денари.

„Цената за индустриското јаболко ќе започне од 8 денари, со можност за зголемување во зависност од побарувачката,“ изјави откупувачот.