Доналд Трамп најави почеток на процес за можност за декласификација на документи поврзани со вонземски живот и неидентификувани летечки објекти. Во објава на својата социјална мрежа „Трут соушл“ наведе дека одлуката ја носи поради „огромниот интерес на јавноста“ и дека ќе се утврдува кои материјали можат да бидат ставени на увид.
Најавата следува по прес-конференција на која Трамп беше прашан дали знае дали постојат вонземски суштества. Тој одговори дека не може да каже со сигурност дали постојат, но дека јавноста има право да знае што поседуваат институциите за ова прашање, истакнувајќи дека транспарентноста е важна кога станува збор за информации од јавен интерес.
Во меѓувреме, поранешниот претседател Барак Обама привлече внимание со изјава дадена во поткаст интервју кога беше прашан дали вонземските суштества се реални.
– Тие се реални, но јас не сум ги видел и тие не се чувани во Областа 51 – рече Обама.
Тој додаде дека нема докази дека вонземски живот остварил контакт со Земјата за време на неговиот мандат, но посочи дека универзумот е огромен и дека статистички постои веројатност за живот надвор од нашата планета, додека оддалеченоста меѓу ѕвездите ја прави можноста за директна посета на Земјата многу мала.
Прашањето за неидентификувани воздушни феномени веќе неколку години е тема во американските институции. Во мај 2022 година Конгресот на САД одржа прво јавно сослушување за оваа тема по повеќе од пет децении, на кое претставници на Министерството за одбрана сведочеа за случаи на необјаснети воздухопловни појави регистрирани од воени пилоти и радарски системи.
Во текот на 2023 и 2024 година следуваа дополнителни сослушувања на кои поранешни припадници на армијата и експерти повикаа на поголема транспарентност и појасно објаснување на тоа што државата знае, а што останува неразјаснето.
Според објавата на Трамп, станува збор за започнување процес на идентификација и евентуална декласификација на документи што се однесуваат на вонземски живот, неидентификувани атмосферски феномени и неидентификувани летечки објекти, како и други поврзани информации што ги поседуваат државните институции. Тоа значи отворање административна постапка во која ќе се утврдува кои материјали можат да бидат објавени без да се загрози националната безбедност или доверливи извори и методи.
Најавата не претставува потврда дека постојат докази за вонземски суштества, ниту дека јавноста веднаш ќе добие пристап до сите класифицирани информации, туку почеток на процес што ќе зависи од проценките на безбедносните институции.
Ударен наслов: