Телефонски разговор со Трамп
Рускиот претседател Владимир Путин, во телефонски разговор со американскиот претседател Доналд Трамп, го поставил барањето за целосна контрола над Донецката област како клучен услов за прекин на војната во Украина, јавува The Washington Post, повикувајќи се на два извори запознаени со разговорот.
Путин исто така предложил Украина да се откаже од делови од Запорожје и Херсон, области кои делумно се наоѓаат под руска контрола во замена за Донецк. Според извори, ова е ублажена верзија на барањето што претходно го изнел во август на самитот во Алјаска.
Реакции и натамошни разговори
Американските функционери го оцениле предлогот како можен чекор напред, додека европски дипломати го сметаат за неприфатлив за Киев.
„Тоа е како да им продавате дел од нивната земја за ништо“, изјавил еден дипломат за весникот. Трамп засега не се изјаснил јавно, но по средбата со украинскиот претседател Володимир Зеленски рече дека е време „да престане убивањето и да се постигне договор“.
Во наредните недели, Трамп треба да се сретне повторно со Путин во Будимпешта за продолжување на разговорите.
Фронтот и воената состојба
Линиите на фронтот речиси не се промениле во изминатата година, а Русија моментно контролира околу 20 проценти од украинската територија. Киев се надеваше на испорака на далекусежни ракети „Томахок“, но американската администрација засега не ја одобрила испораката. Според западни извори, Путин и натаму се обидува дипломатски да го легализира фактичкиот статус на окупираните територии.