Објавени три јавни огласи
Агенцијата за вработување објави три јавни огласи за самовработување на невработени лица, преку кои се доделуваат неповратни средства во износ од 7.000 до 20.000 евра. Огласите се објавени на официјалната веб-страница на Агенцијата и ќе бидат активни до 3 јули.
Поддршка за различни категории невработени лица
За финансиска поддршка од 430.500 денари, односно 7.000 евра, можат да аплицираат невработени лица над 29 години. Повикот опфаќа лица со попреченост, корисници на гарантирана минимална помош, невработени мажи до 60 години и жени до 58 години, жени жртви на родово базирано и семејно насилство, лица кои сакаат да го формализираат својот бизнис, невработени Роми и повратници. Пријавувањето се врши во работните клубови на центрите за вработување на АВРСМ, во рамки на програмата „Поддршка за самовработување (Претприемништво)“.
Вториот јавен повик е наменет за невработени лица до 29 години, за кои е предвидена неповратна финансиска помош од 615.000 денари, односно 10.000 евра. Со овој оглас се опфатени корисници на гарантирана минимална помош до 29 години, млади невработени лица, жени жртви на родово базирано и семејно насилство, лица кои сакаат да го формализираат својот бизнис, невработени Роми и повратници.
Грантови за ДОО и задолжителна обука
Третиот оглас се однесува на здружување на корисници во ДОО, односно друштво со ограничена одговорност од две лица. Во овој случај, предвидени се неповратни средства до 1.230.000 денари, односно 20.000 евра, во зависност од целните групи, при што секој од содружниците ќе има еднаков удел од 50 проценти во друштвото.
Во сите огласи е наведено дека обуката за претприемништво и развивање бизнис-вештини е задолжителна. За одделни целни групи е предвидена и менторска поддршка во период од шест месеци.