Државниот завод за статистика потврди дека цените на храната и безалкохолните пијалаци во Македонија се намалуваат втор месец по ред, додека инфлацијата во јули останала на стабилно ниво.
Според најновите статистички податоци, инфлацијата во јули 2026 година на месечно ниво изнесувала 0,1 отсто. На годишно ниво, инфлацијата изнесува 2,3 отсто, додека цените на мало се за 1,8 отсто повисоки во споредба со јули минатата година.
Истовремено, цените на храната и безалкохолните пијалаци во јули се намалиле за 1,1 отсто во однос на јуни. Станува збор за второ последователно месечно намалување на цените во оваа категорија.
Поголем раст во јули е регистриран кај транспортот, каде трошоците се зголемиле за 4,4 отсто, како и кај рекреацијата, спортот и културата.
Министерството за економија и труд соопшти дека продолжува да ги следи движењата на цените преку официјалните статистички податоци, но и преку анализите на набавните и продажните цени и бруто-профитните маржи.
Државниот пазарен инспекторат, пак, продолжува со редовни и засилени контроли со цел да се спречат евентуални злоупотреби и неоправдани поскапувања.
Според официјалните показатели, во моментов нема потреба од воведување нови интервентни мерки, а од Владата најавуваат реакција доколку во иднина се појават неоправдани ценовни шокови или нарушувања на пазарот.