Европската Унија ги повика земјите-членки да ги намалат целите за складирање на природен гас и постепено да почнат да ги пополнуваат залихите за да ја ограничат побарувачката, бидејќи цените на енергенсите растат поради американско-израелската војна против Иран, пишува „Фајненшл тајмс“.
Комесарот за енергетика, Ден Јоргенсен, побара од земјите-членки да ја намалат целната зафатеност на нивните капацитети за складирање гас на 80 проценти од капацитетот, што е 10 процентни поени под официјалната цел на Унијата. Според писмото цитирано од весникот, ова треба да се направи „што е можно поскоро во сезоната на полнење, со цел да се гарантира безбедноста и да се уверат учесниците на пазарот“.
Цените на гасот во Европа скокнаа за дури 35 проценти во четврток откако иранските и израелските напади оштетија некои од клучните инфраструктурни гасни капацитети на Блискиот Исток. Се проценува дека веројатно ќе бидат потребни неколку години за да се поправи штетата.
Јоргенсен во писмото наведува дека снабдувањето со енергија во ЕУ „останува релативно сигурно“, но повика на „заеднички одговор“ на конфликтот. Тој, исто така, предупреди дека „неодамнешните настани упатуваат на тоа дека враќањето на производството на течен природен гас на нивоата пред кризата би можело да потрае подолго“, пренесува „Фајненшл тајмс“.
Залихите на гас во складиштата се клучни бидејќи ѝ овозможуваат на Европа да ја задоволи зимската побарувачка за греење и електрична енергија, поддржувајќи ја енергетската безбедност на регионот.
„Мораме целите да ги направиме пофлексибилни“, изјави за весникот официјалниот претставник на ЕУ.
Како резултат на тоа, Комисијата во среда им наложи на владите флексибилно да ги применуваат правилата на ЕУ за увоз на гас. Овој потег е наменет за да се спречи законодавството за постепено напуштање на руските енергенси ненамерно да ги наруши испораките кои се клучни за стабилизирање на снабдувањето за време на кризата во Иран.