Корисниците добиваат целосна контрола врз вештачката интелигенција
Mozilla најави нова функција во Firefox 148 која им овозможува на корисниците да исклучат секоја AI алатка во прелистувачот. Новата опција доаѓа како одговор на побарувачката за поголема приватност и контрола, овозможувајќи прелистувачот да работи само со класични функции без автоматско генерирање текстови, AI чет-ботови или предлози за табови.
Нови „AI контроли“ во поставките
Во десктоп верзијата на прелистувачот ќе се појави нов дел наречен „AI контроли“, со главната опција „Блокирај подобрувања на ВИ“. Со активирање на овој прекинувач, корисниците можат:
-Да ги отстранат AI чет-ботовите од страничната лента.
-Да го исклучат автоматскиот превод и генерирањето на „alt“ текст за PDF документи.
-Да го оневозможат групирањето на AI табови, кое сугерира имиња на групи и поврзани страници.
-Да ги отстранат прегледите на веб-страниците што прикажуваат клучни точки пред кликнување на врската.
Контрола врз идни AI функции
Mozilla истакнува дека со оваа опција корисникот ќе има контрола и врз сите идни функции на вештачката интелигенција. Исто така, ќе се спречат скокачки прозорци и известувања што промовираат нови AI алатки.
Во време кога други прелистувачи, како Google Chrome, активно интегрираат генеративна вештачка интелигенција, Firefox се позиционира како алтернатива која им овозможува на корисниците да одлучат колку AI сакаат да користат во својата секојдневна работа.
„Со оваа функција, корисникот добива брз, безбеден и едноставен прелистувач без непотребни AI функции што трошат системски ресурси,“ посочуваат од Mozilla.