Во редовната проверка на пошта во зградата на Владата на Србија, службите пронашле три куршуми во коверт адресиран лично до вицепремиерот и министер за внатрешни работи, Ивица Дачиќ, соопшти денеска МВР.
Ковертот бил откриен вчера при скенирање на пратките со рендгенски уред, кога безбедносните служби забележале сомнителна содржина. Истражните органи утврдиле дека пратката била предадена на 26 август во поштенска канцеларија во Пожаревац.
Полицијата веќе го идентификувала и пронашла лицето кое го испратило пликот, а во тек е собирање на докази и проверка на сите околности на случајот.
Од Министерството за внатрешни работи нагласуваат дека се преземаат сите законски мерки за заштита на безбедноста на граѓаните и на државните институции.
