Слаба посетеност на протестот на ССМ: Барање за минимална плата од 500 евра
Сојузот на синдикати на Македонија (ССМ) денеска одржа протест со барање минималната плата да се зголеми од 400 на 500 евра. Иако протестот беше најавен како значаен чекор во синдикалната борба, присуствуваа само околу 100 луѓе.
Јавна седница на улица
Наместо во Работничкиот дом, раководството на ССМ заседаваше на улица. Преку јавна седница, одржана во знак на револт пред Собранието, Стопанската комора и Владата, синдикатот го повтори своето барање за покачување на минималната плата. Организатор на протестот беше Слободан Трендафилов, кој истакна дека работниците заслужуваат повисоки примања и подобри услови за живот.
Сепак, протестот наиде на слаба заинтересираност и само стотина граѓани на улица како што може да забележите и од сликата во продолжение.
Твитерџиите со реакции за малата бројка на собрани демонстранти. „Дали ова може да се нарече протест“, прашуваат тие.
ССМ протест…ако смее ова протест да се нарече.
Па јас во маалото да им речам да протестираме за некоја дупка на асфалт, ќе соберам појќе луѓе.
Во ова ССМ нешто многу не е во ред. pic.twitter.com/61ulLlbdyZ— Фортификација (@Fortiifikacija) April 2, 2025
Ралповски од КСС против Трендафилов
Претседателот на Конфедерацијата на слободни синдикати, Благоја Ралповски, изрази несогласување со протестот.
„Сите сакаме 500 евра минимална плата, но она што требаше да го направиме како конфедерација го направивме во овие девет месеци и работите се тргнати од нула“, вели Благоја Ралповски за нашиот медиум.
Тој ги потенцираше проблемите со кои се соочувал претходните години, но тогаш ССМ бил пасивен.
Останува да се види дали барањата на ССМ ќе бидат разгледани од надлежните институции.