Ново Лисиче го добива првиот мултифункционален културен центар
Градоначалникот на Општина Аеродром, Дејан Митески, премиерот Христијан Мицкоски и министерот за култура и туризам, Зоран Љутков, денеска извршија увид во градежните активности за целосна реконструкција и уредување на првиот мултифункционален центар во Ново Лисиче. Објектот ќе стане современо културно и социјално средиште, наменето за концерти, театарски претстави, кинопроекции, изложби, конференции и други настани.
Проект вреден 99 милиони денари и површина од 1.500 квадратни метри
Митески нагласи дека Општина Аеродром за првпат создава инклузивно културно јадро кое ќе го поттикне креативниот и заеднички развој на заедницата. Реконструкцијата опфаќа уредување на околу 1.500 м², а за првата фаза од проектот општината обезбеди 99 милиони денари преку јавен повик на Владата. Мицкоски истакна дека станува збор за нов и значаен објект кој претставува додадена вредност и за Аеродром и за поширокиот скопски регион.
Современ, пристапен и дел од програмата за Европска престолнина на културата
Новото решение предвидува главна сала со повеќе од 240 седишта, ред за лица со попреченост, фоаје, бифе, едукативни простори и работилници. Ќе биде изграден и лифт, што ќе овозможи целосна пристапност за сите граѓани. Министерот Љутков посочи дека по уредувањето, мултифункционалниот центар ќе биде вклучен во програмата за Скопје – Европска престолнина на културата 2028 година. Општина Аеродром останува посветена на современи инфраструктурни решенија кои ќе го подобрат квалитетот на живот на жителите на општината и на целиот град.
Погледнете ја фотогалеријата:
