ГЕНЕРАЦИЈАТА ЗЕТ И РОДОВИТЕ УЛОГИ: Речиси една третина од младите мажи смета дека сопругата треба да биде послушна

Истражување открива јаз меѓу ставовите на младите мажи и постарите генерации

Речиси една третина од мажите од генерацијата Зет веруваат дека сопругата секогаш треба да го слуша сопругот, покажува глобално истражување спроведено меѓу 23.000 луѓе во 29 земји, меѓу кои Велика Британија, САД, Бразил, Австралија и Индија.

Според резултатите, младите мажи имаат потрадиционални ставови за родовите улоги отколку постарите генерации. Околу 33 проценти од нив сметаат дека сопругот треба да го има последниот збор при важни семејни одлуки, додека само 13 проценти од бејби-бумерите се согласиле со тоа. Кај жените, 18 проценти од генерацијата Зет се согласуваат со ваквите ставови, во споредба со шест проценти кај постарите.

Најголема согласност со овие традиционални уверувања е забележана во Индонезија (66 проценти) и Малезија (60 проценти), додека во САД процентот изнесува 23, а во Велика Британија само 13 проценти.

„Иако поддршката за родова еднаквост останува силна, сепак во одредени аспекти забележуваме потрадиционални ставови кај младите мажи“, вели проф. Хиџунг Чанг, директорка на Глобалниот институт за женско лидерство при Кралскиот колеџ во Лондон.

Истражувањето покажува дека 24 проценти од мажите од генерацијата Зет сметаат дека жените не треба да бидат премногу независни, додека само 12 проценти од бејби-бумерите се согласуваат со тоа. Исто така, 21 процент од младите мажи веруваат дека „вистинската жена“ не треба прва да иницира сексуален однос, во споредба со 7 проценти од постарите мажи.

Повеќе од половина од мажите од генерацијата Зет (59 проценти) сметаат дека од нив се очекува премногу во однос на поддршката за родова еднаквост, додека кај бејби-бумерите тој процент изнесува 45. Меѓу жените, процентите се 41 за генерацијата Зет и 30 кај постарите.

Интересно е што 41 процент од младите мажи сепак сметаат дека жените со успешна кариера се поатрактивни, што укажува на контрадикторни ставови.

Поранешната австралиска премиерка и претседателка на Глобалниот институт за женско лидерство Џулија Гилард вели дека резултатите се загрижувачки:

„Не само што многу мажи од генерацијата Зет имаат ограничувачки очекувања кон жените, туку и самите се затвораат во тесни родови улоги“.

Истражувањето покажува и јаз меѓу личните ставови и перцепцијата за општествените очекувања. Во Велика Британија, само 14 проценти од испитаниците лично сметаат дека жените треба да ја носат главната одговорност за грижата за децата, додека 43 проценти веруваат дека општеството тоа го очекува.