Сосема е јасно дека ние треба да воведеме еден регистар и да бележиме колку пати е поттикната со таков говор напади врз македонската државност, нација и историски личности, забележано со датум и приложено до Советот на Европа од нашата дипломатска мисија таму, изјави поранешниот амбасадор во Република Бугарија Марјан Ѓорчев во вечерашното гостување во Централниот дневник на Телевизија Сител во „Тема на денот“.
Тој додаде дека треба еднаш да почнеме офанзивно да дејствуваме, бидејќи до сега ние дипломатски не реагиравме во Советот на Европа во Стразбур каде што ние имаме мисија таму.
-Ако ние имаме национално единство, политичко единство во Парламентот тогаш ние нема од што да се плашиме за да им кажеме на нашите пријатели, колеги од Република Бугарија, дека од тука натака имаме сосема друг пристап кои е истоветен со вашиот рамноправен и симетричен, рече Ѓорчев.
Ѓорчев посочи дека доколку сакаме да имаме успех во преговорите со Република Бугарија мора да им предочиме на кои точки од Договорот ние не се согласуваме.
-По точката за заедничка историја, асиметријата по националните малцинства и по ред други прашања кои се наведени во тој договор. Мора да се понуди од македонска страна за тие точки ајде да направиме анекс кон договорот или репрограмирање , кажа Ѓорчев.
Ѓорчев потенцираше дека во секој случај тоа е нужно, ако сакаме да го откочиме процесот, бидејќи вака нема веќе каде да одиме и се наоѓаме во слепа улица со повторно бесконечна приказна со удирање на главата во ѕид и мора еднаш тој процес да се откочи.