ГОЛЕМА ИНВЕСТИЦИЈА ВО ОБРАЗОВАНИЕТО: 40 милиони евра за студентски домови и училишта

Започнува нов инвестициски циклус за подобрување на условите за учење

Со нов инвестициски бран, Министерството за образование и наука најавува засилени активности за унапредување на условите во образовниот систем, со фокус на поквалитетно образование и подобар стандард за учениците и студентите. Во рамки на овие активности, покрај тековните реконструкции на студентските домови, се планира и започнување на темелна обнова на државни училишта со ресурсни центри, кои се клучни за развојот на инклузивното образование.

За реализација на овие активности се обезбедени 40 милиони евра од Германската развојна банка KfW, со поддршка од Европската унија преку Инвестициската рамка за Западен Балкан. Со овие средства ќе се спроведе втората фаза од темелната и енергетски ефикасна обнова на преостанатите седум државни студентски домови. Во тек е реконструкцијата на домовите „Кузман Јосифовски Питу“ и „Стив Наумов“, а истовремено се планира реконструкција и на седум државни училишта со ресурсни центри за ученици со посебни образовни потреби.

Дополнителни средства за енергетска ефикасност и подготовка

Покрај основниот буџет, обезбеден е и неповратен грант од 1,25 милиони евра преку Програмата за регионална енергетска ефикасност за Западен Балкан, поддржана од Европската унија. Овие средства се наменети за подготовка на реконструкциите, вклучително енергетски контроли, изработка на детални проекти и спроведување на тендерски постапки за енергетски ефикасна обнова.

Договорите за користење на средствата ги потпишаа министерката за образование и наука Весна Јаневска, министерката за финансии Гордана Димитриеска Кочоска и Пабло Алварез Обрадор од Германската развојна банка KfW. На потпишувањето присуствуваа и Штефан Худолин од Делегацијата на Европската унија во Скопје, како и заменик амбасадорот на Германија, Јан-Аксел Фос.

Со оваа инвестиција се очекува подобрување на условите за живот и учење на младите, унапредување на инклузивноста во образованието, како и зголемување на енергетската ефикасност на јавните објекти и намалување на емисиите на јаглерод диоксид.