Горан Костовски ќе биде кандидат на Левица за градоначалник на Аеродром?

Советникот во општина Аеродром, Горан Костовски, на социјалните мрежи познат по псевдонимот Чиз, е најсериозен кандидат на Левица во трката за градоначалник во оваа општина на претстојните локални избори – дознава Радио Лидер од висок партиски извор.

Нашиот извор брифира дека Костовски е фаворит во бастионот на Левица, како млад и креативен човек, широко присутен на социјалните мрежи но и во медиумите.

– Кај младите во Аеродром, Костовски со својот рејтинг дури го засенува и лидерот Апасиев. – вели нашиот извор.

Во изминатиот период во огранокот на Левица во Аеродром имаше големи турбуленции откако партијата ја напуштија браќата од Пука Козметика и претходната кандидатка за градоначалник Весна Кираџиева.

Сепак, според многумина од Левица Аеродром, токму Костовски е човекот кој може да се наметне како обединувачки фактор и да ја врати партијата на старите патеки.

– СДСМ е навистина слаб во Аеродром, така што ако не победи ВМРО-ДПМНЕ, шанса имаме само ние. Токму Чиз е човекот кој може да привлече гласови и од ДПМНЕ, но и од СДСМ. – вели нашиот извор.

Сега се е во рацете на партискиот лидер Димитар Апасиев, кој треба да пресече дали ќе му ја даде довербата да го води Аеродром на човекот кој може да биде закана и за неговото столче.