Илјадници домаќинства останаа без електрична енергија во регионот на Југозападна Англија откако бурата „Остин“ ја погоди оваа област. Истовремено, северните делови од земјата веќе се подготвуваат за нов силен бран и втора бура во сезоната, јавуваат метеоролошките служби.
Според прогнозите, силни ветрови и обилни врнежи од дожд ќе ги зафатат северните региони на Велика Британија, при што ударите на ветерот ќе достигнуваат брзина и до 128 километри на час. Британската метеоролошка служба издаде портокалово предупредување за опасно време кое ги опфаќа Шкотска, Северна Англија сè до Карлајл, како и североисточниот дел на Северна Ирска, со важност од 21 часот денеска и во текот на утрешниот ден.
Синоптичарите предупредија дека новата временска стихија може да претставува директна опасност по безбедноста на граѓаните, поради што метеоролошката служба упати официјален совет до населението да не излегува надвор доколку нема итна потреба. Издадени се сериозни предупредувања за можни прекини и проблеми во одвивањето на железничкиот и фериботскиот транспорт низ засегнатите подрачја.
Повеќе од 3.700 домаќинства во југозападниот регион сè уште немаат електрична енергија, според официјалните податоци објавени на мапата на дистрибутивната компанија National Grid. Од компанијата информираа дека нивните теренски екипи од самиот почеток на невремето успеале успешно да го обноват снабдувањето со струја кај повеќе од 60.000 домаќинства.
Ветерот се очекува да ја достигне својата максимална јачина во текот на вечерните часови. Иако врнежите постепено ќе стивнуваат во поголемиот дел од земјата, тие ќе продолжат со висок интензитет во Шкотска и Северна Ирска, каде во повисоките планински предели на Шкотска се прогнозира да наврнат и до 100 милиметри дожд на метар квадратен.